ОБЕГ-ын дарга Т.Бадрал “Өнөөдөр тусгай нислэгийн онгоцоор ирсэн нэг иргэнээс коронавирусийн халдвар илэрлээ. Нөхцөл байдал амаргүй байна. Өнгөрсөн хугацаанд 5 удаагийн нислэг хийсэн. Консулын газруудад манай улсын 4805 иргэн эх орондоо ирэх хүсэлтээ ирүүлсэн. Энэ дагуу гурван нислэгийг ирэх сард үйлдэхээр боллоо.

• Дөрөвдүгээр сарын 2-ны 08:00 цагт Улаанбаатар-Сөүл рүү ниснэ
• Дөрөвдүгээр сарын 3-нд 1:30 цагт Улаанбаатар-Токио рүү ниснэ
• Дөрөвдүгээр сарын 4-нд 08:30 цагт Улаанбаатар-Сөүл рүү нисэхээр болсон.

Ямар учраас Сөүл руу хоёр удаагийн нислэг хийж байгаа гэхлээр тус улсаас 2000 орчим иргэн эх орондоо ирэх хүсэлтээ ирүүлсэн. Иймээс хоёр удаа нислэг үйлдэхээр болсон. Гурван удаагийн нислэгээр нийт 750 иргэнийг авчирна.

Гадаадын зарим улсууд иргэдээ татан авч байна. Энэ хүрээнд өнөөдөр Австрали улсын зургаан иргэн эх орон руугаа явсан. Тэгвэл ирэх амралтын өдрүүдэд БНСУ-ын Засгийн газар 200 орчим иргэнээ татан авахаар болсон” хэмээв.

Энэ гурван нислэгээр ирэх зорчигчдод ямар шаардлага тавьж байгаа вэ гэхээр дээрх иргэдийг шууд 21 хоног тусгаарлахаар байгаа. Урьд нь 14 хоног гэж байсан бол одоо нөхцөл байдал өөрчлөгдөж 21 хоног болгож байна. Гаднаас ирж байгаа иргэд 21 хоногийн тусгаарлалтад байх төлбөрөө төлөх шаардлагатай.

Нэгдүгээрт: 21 хоногийн тусгаарлалтын байрны төлбөрөө төлөх

Хоёрдугаарт: Шинжилгээгээ хийлгэсэн бичигтэй иргэнийг онгоцонд суулгана

ГХЯ-ны Консулын газрын дарга Л.Мөнхтүшиг “Сөүлээс ирэхээр 800 орчим иргэн бүртгүүлсэн байсан. Бүртгэлийн дарааллаар иргэдээ авчрахаар болсон. Коронавирусийн шинжилгээг тухайн улсад хэрхэн хийх зохион байгуулалтын ажлыг Элчин сайдын яамнаас өнөөдөр чиглэл өгч ажиллана. Хамгийн боломжит, аюул багатайгаар хэрхэн зохион байгуулахыг тухай бүрт мэдээлэл өгнө” хэмээв. 

МХЕГ-ын дэд дарга Г.Сугарбат "Энгийн нислэг биш учир онгоцонд хоолоор үйлчлэхгүй. Онгоцонд амны хаалт зүүх, ариун цэврийн өрөө орох зэргээр шилжилт хөдөлгөөний хийхгүйн тулд суухаас өмнө хувийн бэлтгэлээ сайтар хангах хэрэгтэй. 

Асуумж бичиг 20 асуулттай, үүний 14-т нь заавал хариулах ёстой. Иргэд асуумжаа буруу, дутуу бөглөж хариуцлагагүй хандаж байна. Ингэсэн тохиолдолд хуулийн хариуцлага хүлээх заалттайг санаарай.

Тусгай үүргийн онгоцоор ирсэн хүмүүс суудлын дугаараа буруу бичиж байна. Ингээд хавьтал тодорхойлоход хүндрэл үүсдэг. Истанбулын нислэгээр ирж, халдвар авсан нь тогтоогдсон иргэн л гэхэд суудлын дугаараа буруу биччихсэн. Тиймээс үүнийг анхааралдаа авах хэрэгтэй. Халуунтай хүнийг авахаа больчих вий гэж халуун бууруулах эм ууж болохгүй. Халуурсан бол тусгаарлан эмчлэх байр луу очно, эрт арга хэмжээ авахуулна.

Онгоцноос зорчигчдын нэрс дуудаж буулгана, нэг дор овоорч буухгүй. Тусгаарлан ажиглагдах хүмүүс урд хаалгаар, эмчлэн тусгаарлагдах хүмүүс хойд хаалгаар бууна" гэлээ. 

Монгол Улсад коронавируст халдварын тархах эрсдэлийн зургаа дахь шатны үнэлгээг гуравдугаар сарын 25-ны өдөр Халдварт өвчин судлалын үндэсний төвд хийлээ.

Эрсдэлийн үнэлгээг Шадар сайдын 2017 оны А\08 тоот тушаалаар батлагдсан “Эрсдэлийн үнэлгээний аргачлал”-ын дагуу ЭМЯ, ХӨСҮТ, ОБЕГ, ТЕГ, ЦЕГ, МХЕГ, ХМХГ, ЗӨСҮТ болон ДЭМБ-ын хамтарсан ажлын хэсэг явуулсан юм. Уг үнэлгээгээр манай улсад халдвар тархах эрсдэл өндөр байна гэж гарсан юм.

---