УИХ-ын гишүүн Б.Жавхлан коронавирусийн үед эдийн засгийг хэрхэн дэмжих хэрэгтэй талаарх байр суурийг хүргэж байна.

УИХ-ын гишүүн Б.Жавхлан: 

-Коронавирус бүх зүйлийн суурь нь хүн юм байна сануулж байна. Эдийн засгийн гол капитал бол алт, мөнгө, зэс биш хүн өөрөө юм байна. Хүний төлөө хийж байгаа бүх арга хэмжээнүүд хамгийн чухал. Засгийн газрын зүгээс цаг алдалгүй авсан арга хэмжээнүүдээ цаашид хэрэгжүүлэх хэрэгтэй.

Харин эдийн засгийн хувьд дэлхий даяараа зогсонги байдалд орчихлоо. Ялангуяа үйлчилгээний салбар, жижиг дунд бизнес эрхлэгчид хамгийн ихээр өртөж ажлаа байраа цомхотгох хүртэл арга хэмжээг авч байна. Ийм хүнд үеийг давж гарахын тулд төрөөс бизнес эрхлэгчдээ дэмжих үүднээс тусламж татаасыг өгөхөөс өөр арга байхгүй. Өөр айхтар ухаантай зүйл хайгаад хэрэггүй. Дэлхийн бусад улс орнууд хувийн хэвшлээ дэмжих үүднээс урт хугацааны хүү багатай зээл олгохоор болж байна. Түүнчлэн орлого багатай иргэдээ халамж өгөх хэрэгтэй.

Сонгууль дөхсөн энэ үед төсвийн тодотгол хийх нь эрсдэлтэй. Засгийн газар өөрийнхөө хүрээнд зардлаа танах хэрэгтэй.

Татаасын хувьд банкнуудтайгаа хэлэлцээрт орох хэрэгтэй. Манай төсөв 10-12 их наядын хэмжээнд яригддаг. Эдийн засагчдын ярьж буйгаар 700-800 тэрбум төгрөг, цаашлаад 1 их наяд төгрөгийн санхүүжилтийг гаргахад зорилтод бүлгийн эдийн засгийг дэмжих боломжтой гэж харж байгаа.

Мэдээж 1 их наяд төгрөгийг зүгээр өгч болохгүй. Бизнес эрхлэгчдэд урт хугацааны хүү багатай зээл маягаар өгч болно. Дээрх мөнгийг ДЭМБ, Олон улсын валютын сан, Азийн хөгжлийн банкнуудын олгож байгаа боломжуудыг олж авах хэрэгтэй.

---