ДЭМБ-ын албан ёсны хамгийн сүүлийн үеийн тоо мэдээлэлд дурдсанаар коронавирусийн халдвар дэлхийн 185 улсад бүртгэгдэж, тус өвчнөөр өвчилсөн хүний тоо 275,125 болжээ. Энэ нь урьд өдрийнхөөс 30,052-оор нэмэгдсэн үзүүлэлт бөгөөд тус өвчнөөр нас барсан хүний тоо 11376-д хүрээд байна.

Сүүлийн 24 цагийн хугацаанд Итали улсад халдварын 5986 шинэ тохиолдол бүртгэгдэж, 627 хүн нас барсан бөгөөд нийт нас барсан хүний тоо 4032-т хүрчээ. Үүний улмаас тус улс нас барсан хүнийхээ цогцсыг хадгалах байр савгүй болж буй бөгөөд шарил чандарлах газар нь өдөр шөнөгүй ажиллаж байгаа хэдий ч ачааллаа дийлэхгүй байгаа гэдгийг дэлхийн хэвлэл мэдээллийн байгууллагууд онцолсоор байна.

Коронавирусийн халдвар эрчимтэй тархаж буй дэлхийн гурав дахь том голомтоор Испани улс нэрлэгдэж байна. Тус улсад 3433 халдвартай иргэн бүртгэгдэж, 262 хүн нас барсан бол Герман Улсад 4528 хүн халдвар авсан болох нь тогтоогдож 24 хүн нас бараад байна.

Харин АНУ-д халдварын 5593 шинэ тохиолдол бүртгэгдэж, 49 хүн нас баржээ. Коронавирусийн халдвар Америк болон Европ тивд эрчимтэй тархаж байгаа эсрэгээрээ тус халдвар Ази тивд буурах хандлагатай байна. Тухайлбал, БНХАУ-д сүүлийн 24 цагийн хугацаанд нэг ч халдвар шинээр бүртгэгдээгүй бөгөөд уг өвчнөөр нэг ч хүн нас бараагүй бол БНСУ-д 87 шинэ халдвар бүртгэгдэж гурван хүн нас баржээ.

 

---