Улсын онцгой комиссын ээлжит хуралдаан 14:00 цагаас эхэлсэн. Уг хурлаар их, дээд, дунд сургууль, коллеж, цэцэрлэгийн сургалтын карантиныг сунгах эсэх талаар болон бусад асуудлыг хэлэлцэж шийдвэрлэсэн талаар мэдээлэл өглөө. 

Шадар сайд, УОК-ын дарга Ө.Энхтүвшин: 

-Дэлхий улс орнуудад байдал амаргүй байгаа учир хөл хориог 4 дүгээр сарын 30 хүртэл сунгахаар шийдвэрлэлээ. Үүнд, сургууль, цэцэрлэгийн үйл ажиллагаа, төмөр зам, олон улсын зорчигч тээврийн үйл ажиллагаа хамаарна. 

Итали улсаас 300 монгол иргэний төлөөлөл эх орондоо буцах саналаа ирүүлсэн. Мөн БНСУ, Европын улс орнуудаас, Австрали болон БНЭУ-аас иргэд чартер нислэгээр буцах саналаа илэрхийлээд байна. Дэлхийн улс орнуудад гадаадын хүн байтугай дотоодын иргэд нь хүртэл хүнд байдалд ороод байгаа. Одоо тусгаарлагдсан иргэдийн 14 хоногийн хугацаа дууссаны дараа дахин тусгай үүргийн нислэг нисгэх талаар судалж шийдвэрлэнэ. 

Ирэх долоо хоногт УИХ-ын чуулган эхлэх ёстой. Гэхдээ өнөөдөр тэгэх ёстой, ингэх ёстой гэж хэлэх боломжгүй байна. 

БСШУС-ын сайд Ё.Баатарбилэг: 

-ЭМЯ болон ЮНЕСКО-гийн санал, шийдвэрийг үндэслэн 3 дугаар сарын 30 хүртэл сунгасан байсан хөл хориог 4 дүгээр сарын 30 хүртэл сунгахаар шийдвэрлэлээ. Дэлхийн 114 улс сургууль, цэцэрлэгийн үйл ажиллагааг түр зогсоож, 890 сая сурагч онлайнаар хичээллэж байна. Монголын хувьд цэцэрлэгийн 500, ЕБС-ийн 1646 цагийн хичээлийг 18 телевизээр 180 гаруй тэргүүлэх зэрэгтэй багш нар зааж байна. 

Хэрэв 4 дүгээр сарын 30-нд хичээл эхэлбэл 5 дугаар сарын 2-ны бямба гарагт хичээллэж, бага анги 6 дугаар сарын 6-нд, дунд болон ахлах анги 6 дугаар сарын 13-нд амарна. Цэцэрлэг 5 дугаар сарын 31-нд хичээлийн жил нь дуусгавар болно. 

ЕЭШ-ийг сонгуулийн дараа буюу 7 дугаар сарын 2-нд явуулна. Их, дээд сургуулиуд 6 дугаар сарын 15-нд амарч, элсэлтийн ажиллагааг 7 дугаар сарын 7,8-нд явуулахаар төлөвлөж байна. ЕБС-иуд хичээлийн шинэ жилийн нээлтээ 8 дугаар сарын 15-ны даваа гарагт нээнэ. Багш нар 6 дугаар сарын 15-наас 8 дугаар сарын 24-ний хооронд амарна. 

4 дүгээр сарын 30 хүртэл урлаг, соёл, спортын ямар нэгэн арга хэмжээ зохион байгуулагдахгүй. Зөвхөн Олимпод оролцох тамирчид онцгой дэглэмээр дасгал сургуулилтаа хийнэ. 

Хичээл орохгүй байгаа учир төлбөрийг буцааж олгох уу гэж асууж байгаа. Төлбөртэй сургуулиуд байтугай улсын сургуулиудад байдал хүнд байгаа. Хичээлүүд онлайнаар орж байна. Зарим сургуулиуд хагас жилийн төлбөрөө оюутан, сурагчдаасаа аваагүй байсан. Гэтэл хичээлүүд явагдаад байгаа нөхцөлд багш нарын цалинг яах вэ гэдэг асуудалтай тулгараад байгаа. 

1-р ангийн сурагчдын хувьд эцэг, эхчүүд цуг хичээллэх, тусалж дэмжих, багш нартай нь холбоо харилцаатай байх зайлшгүй шаардлагатай байгаа. 

Зам, тээвэр хөгжлийн сайд Б.Энх-Амгалан: 

-4 дүгээр сарын 30 хүртэл төмөр зам, олон улсын зорчих хөдөлгөөн зогсож байна. Зөвхөн орон нутгийн төмөр зам, нислэг үйлдэгдэж байгаа. Алтанбулаг, Цагааннуурын боомтоор ачаа тээвэр хэвийн явагдаж байна. 

Уул уурхайн бүтээгдэхүүнүүд хэвийн гарч байгаа. Гашуунсухайтын нүүрсний тээвэр даваа гарагаас эхэлнэ. Зөвхөн контейнер бүхээгтэй 70-100-хан машинаар тээврийг гүйцэтгэнэ. Жолооч нар тусгай хувцас өмсөж, буухгүйгээр тээвэрлэж хүргэнэ. 

Дарханы зам гүйцэтгэлийн 105 хятад иргэн даваа гарагийн тусгай нислэгээр ирнэ. БНХАУ-даа шинжилгээнд орсон хүмүүс. Ирэхэд нь давхар шинжлээд, Төв аймагт 14 хоног тусгаарласны дараа ажилд нь оруулна. Монгол туслан гүйцэтгэгч нар ажилдаа гарсан. 

---