АИ-92 шатахууны үнэ өнөөдрөөс литр тутамдаа 50 орчим төгрөгөөр буурч байгаа талаар АМГТГ-ын Газрын тос хариуцсан орлогч дарга Ц.Эрдэнэбаяр мэдэгдсэн билээ. 

Тэрбээр "Даваа гарагаас эхлээд хямдарсан үнэтэй шатахуунууд орж ирж эхэлсэн. Дэлхийн зах зээл дээр газрын тосны үнэ буурснаар АИ-92 шатахууны үнэ тонн тутамдаа 58 ам.доллараар хямдарч орж ирж байна. Ингэснээр шатахууны үнэ литр тутамдаа 120-130 төгрөгөөр буурах нөхцөл бүрдсэн ч ханшийн нөлөөгөөр 70-80 төгрөг нь хасагдахаар байгаа. Иймд 50 орчим төгрөгөөр буурах болж байна" гэсэн юм.

Түүнчлэн өнөөдөртөө багтаад бүх ШТС-ууд үнээ 50 төгрөгөөр буулгана гэжээ. Тэгвэл 16:00 цагийн байдлаар СодМонгол ШТС АИ-92 шатахуунаа 50 төгрөгөөр бууруулсан байна.

Харин бусад шатахуун борлуулдаг компаниудиас үнээ буулгасан эсэхийг тодруулж асуухад “Одоогоор үнээ буулгаагүй байгаа ч мэдээлэл авсан” гэдгийг дурдав.

АИ-92 шатахууны үнэ: 

• Жаст ойл 1760
• Магнай трейд 1840
• Петровис 1840
• СодМонгол  1790
• Шунхлай 1820 төгрөг

Нийслэлийн Статистакийн газар /2020:03:12/

“Петровис” группийн ерөнхийлөгч Ж.Оюунгэрэл өөрийн твитер хуудсандаа “ОХУ-аас Монголд нийлүүлж байгаа шатахууны үнэ түүхий нефтийн үнэтэй шууд уялдаатай өөрчлөгдөхгүй. Роснефть 3 сарын үнийг хоёр сарын сүүлээр өгсөн. Дөрөвдүгээр сарын үнэ буух байх гэж бодож бна. Шатахууны үнийг Засгийн газраас хянадаг. Үнэ буусан үед онцгой татвараа нэмээд нэмэгдсэн үед татвараа бууруулдаг. Түүхий нефтийн үнэ, шатахууны үнэ өөр. Шатахууны үнийг Сингапурын биржийн үнээр тогтоож байхаар ОХУ-ын Роснефть компанитай гэрээтэй” хэмээн жиргэжээ.

---