Засгийн газрын өнөөдрийн хуралдаанаар хэрэглээний зээлийг 90 хоногийн хугацаанд үндсэн зээл болон хүүг төлөхөөргүй болгож, хойшлуулах шийдвэр гаргасан талаар Сангийн сайд Ч.Хүрэлбаатар болон Монголбанкны ерөнхийлөгч Б.Лхагвасүрэн нар Төрийн ордонд мэдээлэл хийлээ.

-Зээлээ төлөөгүй зээлдэгчдийг зургаан сарын турш хугацаа хэтэрсэн зээлийн ангилалд оруулахгүй

-Зээл төлөх хугацааг хойшлуулсан гурван сард зээлийн хүү нэмж бодогдохгүй

-Зээлдэгчийг "чанаргүй", "эрсдэлтэй" гэх мэт зээлийн ангилалд оруулахгүй

-Энэ шийдвэр арилжааны банкууд, ББСБ-уудад хамаатай

-Зээлээ төлсөн байгаа бусад иргэдийг хохироохгүйн тулд дээрх шийдвэрийг нэгдүгээр сарын 27-ноос зургаадугаар сарын 27-ныг хүртэлх хугацаанд мөрдөнө

-"Хэрэглээний зээл"-д автомашин, цалин, ипотекийн зээл хамаарна

Санхүүгийн тогтвортой байдлын зөвлөл хуралдаж, коронавирусийн халдвар, тархалтын үед эдийн засгийн нөхцөл байдалтай уялдуулан энэхүү шийдвэрийг гаргажээ. 

Тус зөвлөлийн гишүүн Монголбанкны ерөнхийлөгч Б.Лхагвасүрэн: 

Цар тахлын үеийн бэлэн байдлыг нэгдүгээр сарын сүүлээс хойш зарласан. Үүнээс хойш гарсан санхүүгийн хүндрэлийг судалж байна. Эн тэргүүнд хэрэглээний зээлийн талаар судаллаа. Нийт зээлдэгчийн 90 гаруй хувь нь хувь иргэний хэрэглээний зээл байдаг. 90 хоногийн хугацаанд үндсэн өр болон зээлийн хүүг төлөхөөргүй болгож, хойшлуулж байна. Энэ шийдвэр нэгдүгээр сарын 27-ноос 90 хоногийн хугацаанд хүчинтэй байна.

Хүү төлөх, үндсэн өрөөс төлөх шаардлагагүй тул тухайн хэмжээний хөнгөлөлт гарч ирнэ. Банкуудад хүүгийн орлого буурах, эх үүсвэрээсээ алдаж байгаа тул зохицуулалтын хүрээнд зөөлрүүлнэ.

Зээл гэрээгээр зохицуулагддаг тул аж ахуйн нэгжүүд зээл авсан банктайгаа уулзаж, хугацаагаа сунгаж буй талаар гэрээндээ бүтцийн өөрчлөлт хийлгэх боломжтой. Бүтцийн өөрчлөлтийг хэрхэн хийх талаар журмын хүрээгээр тодорхой тусгаж өгнө.

Хэрэглээний зээл дээр нэг сарын хугацаанд зээлээ төлж чадаагүй бол ангилал бууруулдаг байсан бол өндөржүүлсэн бэлэн байдал зарласнаас хойш зургаан сарын хугацаанд буюу 2020 оны нэгдүгээр сарын 27-ноос зээлийн ангилалд өөрчлөлт оруулахгүй. Хэрэглээний зээлд машины лизинг, цалингийн зээл, ипотекийн зээл хамаарна.

Зээл төлөлтийг хугацааг хойшлуулснаар зээлийн төлөх ёстой хугацаа нь хойшилно. Жишээлбэл 20 жилийн хугацааны зээл 20 жил гурван сар болно гэсэн үг.

Нийт 419 мянган зээлдэгчийн 71.3 хувь нь хэрэглээний зээлтэй байна. Бодлогын хүүг бууруулснаар цаашид зээлийн хүү улам буурах нөхцөл бүрдэж байгаа" гэлээ.

---