“М-Си-Эс” групп М гээд дижитал банк байгуулах тухай мэдээлэл гурван жилийн өмнөөс цацагдсан. Банк байгуулах хүсэлтээ 2017 оны наймдугаар сарын 16-нд Монголбанкинд өгчээ.

Хүсэлтийг хүлээн аваад нэмэлт материал, мэдээлэл зэргийг нягтлан 2018 оны аравдугаар сарын 11-нд М банк бүх шаардлагыг хангасан байна гэсэн хариуг Монголбанк өгсөн юм. Гэвч 2019 оны дөрөвдүгээр сард М банк байгуулах тусгай зөвшөөрлийн хүсэлтийг түдгэлзүүлэх гэсэн агуулгатай албан тоот “М-Си-Эс” группт хүргүүлсэн байна.

Ингээд тус групп шүүхэд хандаж, өнгөрсөн оны сүүлээр Улсын Дээд шүүхээс анхан болон давж заалдах шатны шүүхийн шийдвэрийг хэвээр үлдээж "М-Си-Эс”-ийн банк байгуулах хүсэлтийг зөвшөөрсөн билээ.

Гэвч өнөөдрийг хүртэл шүүхийн шийдвэрийг Монголбанк хэрэгжүүлээгүй байна.

Зарим нэг иргэн М банк байгуулах зөвшөөрлийг олгожээ хэмээн жиргэсэн байсныг Монголбанкны Хэвлэл, мэдээллийн албанаас тодруулахад “Үе үе уг банктай холбоотой ийм мэдээлэл цацагддаг. Ойрын хугацаанд М банкны зөвшөөрлийг олгох асуудлаар хуралдаагүй, шийдвэр гараагүй” хэмээв.

---