Засгийн газрын өчигдрийн ээлжит хуралдаанаар БНХАУ-тай хиллэдэг хилийн боомт, төмөр зам болон агаарын тээврийн үйлчилгээг зогсоож байгааг зарласан. Өнөөдрийн ЭМЯ-ны ээлжит мэдээллийн цагаар энэхүү зохицуулалт хэрхэн хэрэгжих талаар болон корона вирустэй холбоотой цаг үеийн мэдээллийг өглөө. 

Ухань хотоос ирсэн 31 оюутныг маргааш эмнэлгээс гаргана.  

Засгийн газрын өчигдрийн ээлжит бус хуралдаанаар 63 дугаар тогтоолыг баталж, БНХАУ-тай хиллэж байгаа автозам, агаарын зам, төмөр замын боомтын зорчигч тээврийг 2020 оны гуравдугаар сарын 2-ны өдрийг хүртэл зогсоосон.

Хятад байгаа иргэд хүсэлт гаргавал зохион байгуулалттай ирэх арга хэмжээг авч ажиллана. Өнөөдрийн байдлаар 50 орчим иргэн Монгол улс руугаа ирэхээр билет захиалсан байсан гэсэн мэдээлэл байна. Эдгээр иргэдээ хүлээн авах арга хэмжээг авна. Мөн хилээр орж ирсэн иргэдийг 14 хоногийн хугацаанд тусгаарлана.

"Монгол Улсын Ерөнхийлөгчийн зарлиг, Засгийн газраас гарсан тогтоол, шийдвэрийн дагуу ХХААХҮЯ өндөржүүлсэн бэлэн байдалд ажиллаж байна. Хилийг хаах асуудалтай холбоотойгоор хүнсний болон бараа бүтээгдэхүүний тээвэрлэлт зогсоогүй. Гол нэрийн бүтээгдэхүүний нийлүүлэлт тогтвортой байгаа. Шувууны ханиад гарсантай холбоотойгоор шувууны мах, махан бүтээгдэхүүний импортыг түр зогсоосон. Хүнсний хомсдол үүсэхгүй учир бараа бүтээгдэхүүнийг нөөцлөх шаардлагагүй. Иргэд өдөр тутамдаа шинэ, шимтэй хүнс, тэр дундаа адууны мах, аарц хэрэглэж дархлаа дэмжихийг зөвлөлөө.

ОБЕГ Өндөржүүлсэн бэлэн байдлыг хэсэгчлэн авсантай холбоотойгоор нийтийн тээвэр, такси, автомашиндаа гар ариутгагч байршуулж, амны хаалт ашиглаж байхыг анхааруулан хамтран ажиллахыг ААНБ, иргэдэд уриалж байна.

Дорнод, Баян-Өлгий, Хөвсгөл аймгуудад гарсан сэжигтэй тохиолдлуудаас коронавирусийн халдвар илэрээгүй. Өнөөдрийн байдлаар ХӨСҮТ-д нийт 8 хүн, Архангай аймагт нэг хүн тусгаарласан. Шинжилгээний хариуг хүлээж байна. Ухань хотоос ирсэн оюутнуудаас давтан шинжилгээ авсан халдварын ямар ч шинж тэмдэг илрээгүй. Тэдгээр 31 оюутанг маргааш эмнэлэгээс гаргах бөгөөд цаашид эмчийн хяналтанд байлгана гэлээ. 

---