Дэлхийн хамгийн том цахим худалдааны сүлжээ Амазоны гүйцэтгэх захирал Жефф Безос АНУ-ын Лос Анжелес муж дахь хамгийн үнэтэйд тооцогддог 3,6 га талбайтай тансаг харш, эдлэн газрыг 165 сая ам.доллараар худалдаж авсан байна. Түүний худалдаж авсан харшийг нэгэн цагт Варнер Брос кино компанийн Ерөнхийлөгч агсан эзэмшиж, амьдарч байжээ. 

Хэвлэл мэдээллийн салбарын чинээлэг эрхэм Дэвид Геффенээс Беверли Хиллс дэх харшийг худалдаж авчээ. Варнер Брос кино компанийн Ерөнхийлөгч агсан Жэк Варнер уг эдлэн газар, тансаг харшийг анх эзэмшдэг байжээ. 1930-аад оны үеийн Гүрж хэв маягийг хадгалсан харшийн модон шалан дээр нэгэн цагт Наполеон зогсож байсан удаатай.

Архитектурын тухайд үнэтэй гадаах тагт, цэцэрлэгт хүрээлэн, зочдод зориулсан хоёр байшин, асаргааны өрөө, гурван хүлэмж, теннисийн талбай, усан сан, есөн нүхтэй гольфийн талбай болоод машин техникт зориулсан гарааш зэргийг багтаажээ. Жэк Варнерын бэлэвсэн эхнэр Энн харшид амьдарч байсан бөгөөд 1990 онд Геффен үндэсний хэмжээнд хамгийн өндөр үнээр буюу 47,5 сая ам.доллараар дуудлага худалдаагаар авсан байна.

Өнгөрсөн жил гэр бүлээ цуцлуулсан дэлхийн хамгийн чинээлэг 131 тэрбум ам.долларын хөрөнгөтэй Безос найз бүсгүй Лаурен Санчезын хамт тохилог сууц хайсаар шийдвэрээ гаргаж уг харшийг худалдаж авсан хэмээн эх сурвалжид дурджээ.

Эх сурвалж: The Guardian

---