™ watch
™ watch
ЭМЯ-наас шинэ коронавирусийн халдвар, тархалтын талаар өнөөдөр мэдээлэл хийлээ. Өнөөдрийн байдлаар Монгол Улсад 100 гаруй сэжигтэй тохиолдол бүртгэгдээд байгаа бөгөөд коронавирусийн халдвар албан ёсоор бүртгэгдээгүй гэв. Нийслэл хотоос гадна Өвөрхангай, Хөвсгөл, Орхон аймгуудад нэгдүгээр сарын 23-аас хойш өвчлөл гарсан голомтоос ирсэн 20 гаруй хүн байна.
ДЭМБ-ын мэргэжилтэн О.Ариунтуяа: Шинэ төрлийн коронавирусээр үүсгэгдсэн өвчнийг Дэлхийн эрүүл мэндийн байгууллагаас “Covid-19” хэмээн албан ёсоор нэрлэсэн. “Covid-19” гэж нэрлэсэн учир нь “Co” нь “корона”, “Vi” нь “вирус”, “D” нь “өвчлөл” гэсэн үгийн товчлол юм. БНХАУ-аас гадна 24 улс, бүс нутагт халдварын 393 тохиолдол, нас барсан хоёр тохиолдол бүртгэгдээд байгааг тус байгууллага мэдээллээ.
Хоёрдугаар сарын 12-ны 10:00 цагийн байдлаар бүртгэгдсэн тохиолдол 45168, нас баралт 1165 байна. ДЭМБ-ын баг БНХАУ-д хоёрдугаар сарын 10-ны өдөр очин ажиллаж байгаа. Мөн олон улсын баг очиж ажиллахаар бэлдэж байна. Хубэй мужаас гадна газарт нас баралтын түвшин 0.5 хувь, нийт тохиолдолд хүнд өвчлөлийн түвшин 15 хувь байгаа.
ЦЕГ-аас авч хэрэгжүүлж байгаа арга хэмжээг танилцууллаа. Авто замын есөн постод эрүүл мэндийн байгууллагатай хамтран 24 цагаар хяналт шалгалт хийж байна. Нийт 7 аймаг, ХӨСҮТ-д түр хугацаагаар хязгаарлалтыг тогтооход хамтран ажиллаж байна. Цагдаагийн байгууллагаас тавьж буй шаардлагад ард иргэд хүлээцтэй хандахыг уриалж байна.
ХӨСҮТ-ийн захирал Д.Нямхүү “Хоёрдугаар сарын 10-нд Хөвсгөл аймагт тусгаарлагдсан нэг тохиолдлын шинжилгээний хариу сөрөг буюу коронавирусийн халдвар илрээгүй гэж гарсан. Мөн Гашуунсухайт боомтоор зорчсон сэжигтэй 12 хүнээс авсан шинжилгээний хариу сөрөг гарсан. Гэхдээ тэднийг 14 хоног тусгаарлахаар боллоо" гэлээ.
Хоёрдугаар сарын 11-ний өдөр буюу өчигдөр сэжигтэй 7 тохиолдол шинээр илэрч, шинжилгээнд хамруулсан байна. Тэдгээр хүмүүсийн хариу нь гараагүй байгаа аж. Ухань хотоос ирсэн 31 хүний биеийн байдал сайн байгаа. Ямар нэгэн шинж тэмдэг илрээгүй. Тэднийг тусгаарлах хугацаа дуусах дөхөж байна.
ХӨСҮТ-д байгаа лавлагаа лабораторитой адил түвшний лаборатори улсын хэмжээнд дөрөв байгаа. Ховд, Дорнод, Дархан-Уул, Орхон аймагт байгаа эдгээр лабораториуд ХӨСҮТ-тэй адилхан шинжилгээг хийдэг. Одоо шинээр оношлуур ирэхээр эдгээр лабораториуддаа тарааж, халдварын сэжигтэй тохиолдлыг бүсчилсэн байдлаар оношилно" хэмээв.
Замын-Үүд боомтоор 02.11-ний өдрийн 20.00 цагийн орчимд Хөх хот-Улаанбаатар чиглэлийн галт тэргээр халдварт өвчний сэжигтэй зорчигч орж ирснийг Хилийн мэргэжлийн хяналтын албаны хяналтаар илрүүлэн, холбогдох байгууллагууд яаралтай арга хэмжээ авч түр тусгаарлаад байна. Сэжигтэй иргэн БНХАУ-ын Сэчуан мужид 14 хоног туршлага судалсан гэх өгүүлэмжтэй, 37.4 хэмийн халуунтай байжээ. Дорноговь аймгийн Мэргэжлийн хяналтын газраас Замын-Үүд боомтод хүч нэмэгдүүлэн ажиллаж байгаа бөгөөд тус галт тэргээр зорчиж явсан зорчигч, төмөр замын ажилтан нийт 109 хүнийг галт тэргэнд нь түр тусгаарлан, хамгаалалтад аваад байна.
ХӨСҮТ-д нийт сэжигтэй 27 хүнээс 12 хүнээс шинжилгээ авч, 15 хүнийг тусгаарласан бөгөөд шинжилгээ авах шаардлагагүй, шинжилгээний хариу хийгдэж байгаа. Дээрх 12 хүний шинжилгээний хариу гарсны дараа дээрх 15 хүнээс шинжилгээ авах эсэхийг шийднэ.
Короновиурс ахуйн хавьтал болон агаар дуслын замаар бохирлогдсон өтгөнөөр болон шээс, хөлсөөр дамжиж байгаа гэсэн мэдээлэл байна. Халдвартай хүний биеэс гарсан бүх шингэнээр дамжиж байна гэсэн мэдээлэл байна. Коронавирус шил гадаргуун дээр ес хоног амьдрах чадвартай гэсэн судалгаа байна.
