Эрүүл мэндийн яамнаас коронавирусийн тархалт болон халдвараас сэргийлэх авч буй үйл ажиллагааныхаа талаар тогтмол мэдээлж буй юм. Энэ сарын 28-нд 16:00 цагийн байдлаар сүүлийн үеийн мэдээлэл өглөө. 

ЭМЯ-ны Төрийн захиргаа, удирдлагын газрын дарга Б.Цогтбаатар: Өнөөдөр 12.28 цагт Австралийн эрүүл мэндийн байгууллагаас ХӨСҮТ-д мэдээлэл ирүүлэхдээ 2020 оны нэгдүгээр сарын 19-нд Австралийн Мельбурнд очсон Монгол Улсын иргэн шөнө нь халуурсан, коронавирусийн халдвар авсан гэж мэдээлсэн.

ЭМЯ-наас энэ мэдээллийг нягталж, өдөр 14.40 цагт Австралийн Эрүүл мэндийн яамтай утсаар холбогдож албан ёсны мэдээлэл, тайлбар авлаа. Манай улсын иргэн коронавирусийн халдвар аваагүй. Харин тэр хүнтэй нэг онгоцоор Австралид очсон Хятад улсын иргэн коронавирусийн халдвар авсан нь тогтоогдсон байна. Манай улсын иргэн халдвар аваагүй, нэгдүгээр зэргийн хавьталтай гэсэн үг. 34 настай, эрэгтэй Улаанбаатар хотод амьдардаг.

Монгол Улсын иргэн маань нэгдүгээр сарын 19-нд Гуанжоугаас Мельбурн хотод бууж, нэгдүгээр сарын 25-нд Хонгконгоор дамжин Улаанбаатарт ирсэн. Нэгдүгээр зэргийн хавьталтай учир тухайн иргэнийг тусгаарлан, шинжилгээ авна.

Тухайн иргэнд ямар нэг зовиур байхгүй. Гэхдээ шинжилгээ авч, магадлан тодруулна гэв.

Мельбурнд очсон Хятад өвчтөний хувьд БНХАУ-ын Уханьд 14 хоноод Гуанжугаар дамжиж Австрали очсон гэх мэдээлэл байгаа юм. 
Тэгэхээр манай улсын иргэн коронавирусээр халдварлаагүй болохыг ЭМЯ-наас ийн албан ёсоор хэллээ. 

---