УИХ-ын гишүүн Б.Дүрэвдорж ХХААХҮ-ийн сайд Ч.Улааныг огцруулах албан бичгийг УИХ-ын даргад өргөж барьж буйгаа өнөөдөр мэдэгдсэн юм. Учир нь Ч.Улаан сайд болсноосоо хойш монгол малчдын малын үнийг унагааж, орлогыг багасгасан бол хоёрдугаарт махны үйлдвэрүүдийн үйл ажиллагааг доголдуулж, дампуурлын ирмэгт хүргэсэн. Гуравдугаарт БНХАУ-ын эздийн махны үйлдвэрийг дэмжсэн гэж тэрээр үзэж байна. 

 

УИХ-ын гишүүн Б.Пүрэвдорж: 

-Мал, махны үнэ хангалттай хэмжээнд хүрсэн байсан. Төлөг 100 мянга, эм хонь 130 мянга, эр хонь 160 мянгад хүрсэн. Гэтэл энэ үнэ 20-30 мянган төгрөгөөр унасан. Бод малын үнэ 200 мянгаар унасан. Энэ нь Ч.Улааны гаргасан алга дарам цаастай шууд холбоотой.

Манай улс нийтдээ 140 гаруй махны үйлдвэртэй. Үүний зөвхөн 12-т нь БНХАУ-ын мах экспортлох квот олгодог. Энэ олгосон квот нь маш их эрэлтийг бий болгож авлигалаар өгдөг байна. Үлдсэн 130 гаруй компани нь Хятад компаниудын квот дээр махаа экспортлох хүсэлт тавьдаг ч Хятад компаниудын зүгээс авлигал өгч квотыг авсан учраас нэг кг адууны махан дээр 12 юаны төлбөр авч байж өгнө гэдэг шаардлагыг тавьдаг. Адууны мах өнөөдрийн ханшаар 5 мянган төгрөгний үнэтэй байхад адууны махтай адилхан үнэтэй 4800 төгрөгний авлигалыг бий болгож байна. Үүнийг төлсөн аж ахуй нэгжүүд эхлээд өөрсдийнхөө ашгийг бууруулж байна. Хоёрдугаарт, малчдын малын үнийг унагаах замаар авлигалын мөнгийг төлж байна.   

Эндээс харахад жирийн нэг малчин борлуулсан бог тутамд 20-30 мянга, бод тутамд 200 мянган төгрөгний авлигалыг Ч.Улаанд өгч байна гэсэн үг юм.

Нийт 12 компаний 9 нь БНХАУ-ын компани бол үлдсэн 3 нь монголын сайд, дарга нарын компани байна.

Үүн дотор У.Хүрэлсүхийн төрсөн дүүгийн компани 5 мянган тонны зөвшөөрөл авчихсан тэр квотоо зараад явж байна. Ийм луйврын системийг өнгөрсөн бүх ХХАА-н сайдууд хэзээ ч хийж байгаагүй юм. Энэ хулгайн системийг ганцхан Ч.Улааны үед хийж эхэллээ. Өнөөдөр махны компаниуд бүгд асуудалд орсон. Махны компаниуд малчдаас худалдаж авсан малаа үйлдвэрлээд 1,5 юаны ашиг олоод цаашдаа аятайхан ашигтай ажиллалаа гэж ярьж байхад зүгээр зөвшөөрөл өгдөг хүмүүс 12 юаныг нэг кг махан дээр хулгайлж байна. Иймээс малын үнийг унагаасан, малчдаас орлогоос хулгайлсан, дээрээс нь монголын махны үйлдвэрүүдийг квот нэрийн дор үйл ажиллагааг нь боомилж, хятадын компаниудыг дэмжсэн Ч.Улааныг огцруулах нь зүйтэй.

---