ЗГХЭГ-ын дарга Л.Оюун-Эрдэнэ:

-2050 он хүртэл хөгжүүлэх хөтөлбөр өмнөхүүдээс юугаараа онцлог, алсын хараатай болсон бэ? 

-Өмнө гарсан 517 бодлогын баримт бичгийн нэгдэл гэж ойлгож болно. Мөн, олон улсын стандартын дагуу бичигдсан бичиг баримт болж чадлаа. Санхүүгийн тооцоолол, эрсдэлийн анализ, хэрэгжих төслүүдийн ТЭЗҮ-ийг тооцож оруулсан. Энэхүү хөтөлбөр нь Монгол улс урт хугацааны хөгжлийн баримт бичигтэй байх ёстой гэсэн шинэ Үндсэн хуулийн үзэл баримтлалтай нийцэж байгаа.

2030, 40, 50 он гэж гурван шалгуур үзүүлэлтээр авч үзсэн. Иргэдийн орон сууцны талаар баримтлах бодлого, иргэдийг хуримтлалын даатгалд оруулах, их, дээд сургуулиудын өрсөлдөх чадварыг нэмэгдүүлэх, уул уурхай дээр нэмэх нь тэргүүлэх зургаан салбарыг зарлаж өглөө. Уул уурхайг нэмүү өртөг шингэсэн салбар болгож, одооны ашгийг 3-4 дахин нэмэгдүүлнэ. Сэргээгдэх эрчим хүч, өрийн дарамт зэргийг судалж гаргаж ирсэн. Одооны халамжийн бодлогыг шат дараалан өөрчилнө. Халамж зорилтот хэсэг рүү чиглэнэ. 30 жилийн шалгуур үзүүлэлтээр авч үзэхэд Монгол улсын хүн 5,5 сая болж байгаа. Үүн дээр тодорхой бодлогоор дэмжвэл 6 саяас дээш болно гэж үзэж байгаа. Улаанбаатар хотод 3,2 сая хүн төвлөрнө. УИХ дээр хэлэлцүүлэг явахаар та бүхэн илүү их мэдээлэл авах боломжтой. 

-Тэтгэврийн зээлийг тэглэх талаар? 

-ҮАБЗ-ийн зөвлөмж ирсэн. Ирэх долоо хоногоос УИХ дээр хэлэлцэхээс өөр аргагүй болж байна. ХНХ-ын сайд Н.Чинзориг хуулийг өргөн барихаар ажиллаж байна. Зээлийн дарамт дээр төр орохоос өөр аргагүй болсон. Иймд ямар нэг ордтой холбож энэ асуудлыг шийдвэрлэ гэсэн юм байна гэж ойлгож байгаа. ХЗДХЯ, СЯ-наас ирүүлсэн дүгнэлтийг Засгийн газар дээр хэлэлцэж, яаж хэрэгжүүлбэл төсөвт дарамтгүй шийдэх вэ гэдгийг шийдсэний дараа та бүхэнд дэлгэрэнгүй мэдээлэл өгье. 

---