Он дамжин явагдаж буй Залуучуудын хоккейн дэлхийн аварга шалгаруулах тэмцээний хэсгийн тоглолтууд урьд шөнө явагдаж дууслаа.
Урьд шөнө хэсэг тус бүрийн нэг, нэг тоглолт явагдсан ба уг хоёр тоглолт хоёулаа гоол арвинтай байлаа.
А хэсэгт Финланд болон Швейцарийн тоглолтод нийт долоон гоол орсон ба Швейцариуд 5:2 харьцаагаар Финландын багийг буулган авч шуугиан тарилаа. Учир нь Финланд залуучууд 2019 онд тав дахь удаагаа дэлхийн аварга болсон төдийгүй энэ жил ч хэсэгтээ Шведэд 3:2 харьцаагаар азгүй хожигдсоныг эс тооцвол Словакийг 8:1, Казахстаныг 7:1 харьцаагаар хол илүү хожоод байсан юм.
Харин В хэсэгт Канад Чехийн багийг 7:2 харьцаагаар бут ниргэн хэсгээ тэргүүлж шөвгийн наймд А хэсгийн 4-өөр гарсан Словакийн багтай тоглох эрхтэй боллоо.
Шөвгийн найман багийн тоглолт 2020 оны нэгдүгээр сарын 2-ны өдөр явагдах хуваарьтай байна.
Шөвгийн наймд таарсан хамгийн сонирхолтой учраа бол АНУ болон Финландын багууд байх юм. Учир нь тэд 2019 оны дэлхийн аваргын финалд шалгарч 3:2 харьцаагаар Финландчууд ялалт байгуулсан түүхтэй. Энэ удаад шөвгийн 8-д тэд дахин учраа таарлаа.
