Монголын Боулинг Сонирхогчдын Холбоо үүсэн байгуулагдсаны 10 жилийн ой, “Биг Боулинг” төв байгуулагдсаны 10 жилийн ой, “City Cup” тэмцээний 10 жилийн ой, Нийслэл хот байгуулагдсаны 379 жилийн ойн нэрэмжит Нийслэл хотын боулингийн аварга шалгаруулах “CITY CUP 2018” багийн төрлийн нээлттэй энэ сарын 27-28-нд “Big bowling” төвд болно.

10 сая төгрөгийн шагналын сантай энэхүү тэмцээний аварга баг 5 сая, мөнгөн медальт баг 2,5 сая, хүрэл медальт баг 1,5 сая төгрөг аж. Шилдэг тоглогч буюу өндөр онооны эздийг тус бүр 500 мянган төгрөг шагнан урамшуулах юм. Өмнө нь байгаагүй хамгийн өндөр шагналын сантай энэ тэмцээний ерөнхий ивээн тэтгэгчээр уул уурхайн “STEPPE GOLD” компани (“Cтепп Гоулд” ХХК) ажиллаж буй.

Тэмцээнд хамт олон, байгууллага, найз нөхдөөрөө таван хүний бүрэлдэхүүнтэй баг бүрдүүлж орох боломж боулинг сонирхогчдод нээлттэй. Багийн гишүүдийн 4 нь эрэгтэй, 1 нь эмэгтэй тамирчин байх гэнэ. Монголын боулинг сонирхогчдын холбооноос зохион байгуулдаг “CITY CUP” тэмцээн нь хамгийн олон баг оролцдог, өрсөлдөөн ихтэй, сонирхолтой тул хоёр өдөр болдог. Тэмцээнийг уламжлал ёсоор Нийслэлийн Засаг даргын тамгын газар хамтран зохион байгуулна.

 

 

 

---