Хоёр, гурав хоногийн өмнөөс иргэд шахмал түлшний "эрэлд мордох" болжээ. Их наран, Баянзүрх хавийн оршин суугчид шахмал түлш олдохгүй байгаа талаар маш олон сэтгэгдэлээ цахим хуудаст бичжээ. 

Гэр хорооллынхон хөлдөж үх, нэг бол угаартаж үх гэсэн тулгалтанд орж байх шиг...

Тухайлбал, иргэн Bulganaa Lhagvaa: 

"Гэр хорооллын ядарсан иргэн миний биe төр засгийн даалгавраар түлшийг нь түлж угаартахгүй арга хэмжээ авч байлаа. Өнөөдөр түлшээ авах гэтэл дууссан гэнээ. 7 хоногт 6 шуудай ав гэдэг. 5 хонож урьдчилж авч болохгүй. Эсвэл 9 хоноод авбал нөхөж авч болохгүй. Ажил төрөл зав болохгүй байсаар авч чадаагүй нь хохь нь. "Гэр хорооллынхон нэг бол хөлдөж үх, эсвэл угаартаж үх" гэсэн тулгалтанд орж байх шиг..." гэжээ. 

Харин Kiki Kiki гэх хаягтай иргэн:

"Яг одоо 21 дүгээр хороолол, Их наран хавиар шахмал түлш зарж байгаа газар хаана байна. Хайгаад олдоггүй ээ. Маргааш түлэх түлшгүй болчихоод байна..." гэсэн байна. Түүнчлэн иргэд, 

"Шахмал түлшээ илүү авахгүй бол олдохгүй юм байна билээ шүү", "Тоотой өгдөг болохоор маш хэцүү юм. Ес эхэллээ. Шуудайтай нүүрсээ тоог нь нэмээч ээ. Зүгээр аваагүй, мөнгөөрөө авч байгаа шүү дээ", "Бас аймар толгой өвтгөсөн үнэртэй байна. Утаа нь үнэхээр хортой байна. Би хүмүүст хэлээд байхад тоохгүй байсан. Одо үнэхээр мэдрэгдэж байна. Шууд толгой өвдөөд..." гэх мэтээр бичжээ. 

"Тавантолгой түлш" компанийнхны өгч буй мэдээллээс Улаанбаатар хотын хэмжээнд найман хангамжийн бааз, 37 дундын цэг ажиллаж байгаа бөгөөд борлуулалтын цэгүүдийг 16 бүсэд хувааж, өдөрт 1300-1700 тонн сайжруулсан шахмал түлшийг бөөний агуулах болон хангамжийн баазад хүргэж байгаа ажээ. 

Ингэхдээ жилд 1,2 тонн түүхий нүүрсийг 200 мянган гэр хороолол түлдэг байсан бол энэ тоо хоёр дахин буурч, 600 мянган тонн шахмал түлш шатаана гэж тооцоолж байгаа юм. Өөрөөр хэлбэл, нэг айл өдөрт 24 кг нүүрс түлдэг байсан бол 12 кг шахмал түлшээр өдрийнхөө хэрэгцээг хангана хэмээн тооцож буй.  

Гэвч бодит байдал дээр эсэргээр нь байгааг иргэдийн яриа, сэтгэгдлээс харж болно. Долоо хоногийн зургаан шуудай нүүрс нь  хүрэлцэхгүй, даарч, хөрч, зутарч байгаагаа учирлаж байна. Цаашид ес эхлэхээр түлшний хэрэгцээ улам ихэснэ. Тэр үед яах вэ гэх асуулт ч тулгарана. 

Түлшээ базааж чадахгүй байгаа иргэд ийн асуудал яриад байна уу, эсвэл түлш үйлдвэрлэл нь хэрэглээгээ гүйэхгүй байна уу гэдэг ч мөн асуулт юм. Энэ талаар бид сурвалжлан хүргэх болно. 

---