Авлигатай тэмцэх газрын комиссарууд сая ойрмогхон гурван том баривчилгаа явуулсны нэг нь “Магнай трейд” ХХК-ийн ерөнхий захирал Р.Ганзориг, түүний хүү, мөн компанийн дэд захирал Г.Дашням нарыг 08-09-нд шилжих шөнө баривчлан, цагдан хорих 461 дүгээр ангид саатуулсан явдал юм. Саатуулан шалгах 48 цагийн хугацаа өнгөрсний дараа Нийслэлийн прокурорын газраас таслан сэргийлэх арга хэмжээ авах саналыг гаргасан ч Сүхбаатар дүүргийн эрүүгийн хэргийн анхан шатны шүүхийн шүүгч нар хэлэлцээд, хорих шаардлагагүй хэмээн гадуур шалгахаар болсон.

“Магнай трейд” компанийн захирал Р.Ганзориг 2013 оны долоодугаар сард дампуурлаа зарласан “Жаст”  группийн “Жаст ойл” ХХК-ийг 40 гаруй тэрбумаар худалдан авч хүүдээ бэлэглэсэн тухай хэвлэлээр мэдээлэгдсэн. Энэхүү хэргийн мөрөөр Авлигатай тэмцэх газар орж, саяхан саатуулсан ажээ.

Ш.Батхүүгийн “Жаст Ойл” ХХК нь УБ, Сэлэнгэ, Орхон аймгуудад газрын тосны бүтээгдэхүүний агуулахтай, Улаанбаатар хот болон 16 аймагт шатахуун түгээх станцын сүлжээтэй том компани байсан. Ш.Батхүү, Р.Ганзориг нарын наймааг Шударга өрсөлдөөн, хэрэглэгчийн төлөө газар “хууль бус” гэж үзэж, 3 тэрбум төгрөгийн торгууль тавьж байсан нь цагаан дээр хараар үлджээ. Учир нь Монгол улсад үйлчилж байгаа хуулиар давамгай байдлын аж ахуй эрхлэгч адил төрлийн бизнес эрхэлдэг аж ахуйн нэгжийг худалдаж авахдаа Төрийн байгууллагаас заавал зөвшөөрөл авах ёстой байдаг. Гэтэл энэ хуулийг зөрчиж, Р.Ганзориг захирал ямар нэг зөвшөөрөл авалгүй, “Жаст Ойл” ХХК-ийг худалдан авч дэд захирал, өөрийн хүү Г.Дашнямынхаа нэр дээр шилжүүлжээ.

Энэ нь цаагуураа маш хор хохиролтой бөгөөд монопол байдлаа ашиглан “Шатахууны үнэ дэлхийн зах зээл дээр өсөж байгаа учир” хэмээн үнээ нэмэхийг хэн ч хорьж дийлэхгүй байх нөхцөл үүсдэг. 2018 он гарсаар шатахууны үнэ таван удаа нэмэгдээд байгаа. Энэ бүхэн нь 300 шатахуун түгээх станцтай хүнд ямар хэмжээний ашиг оруулах нь ойлгомжтой юм. “Магнай трейд” ХХК нь гишүүн байгууллагуудтайгаа нийлээд 300 гаруй ШТС ажиллуулдаг гэгддэг.

“Магнай Трейд Групп” 130 шатахуун түгээх станц, 13 шатахууны агуулах эзэмшдэг. “Магнай Трейд” ХХК, Нефтийн үйлдвэр, “МТ-Ойл” ХХК түүний эзэмшилд багтдаг. Тэрээр Дорнод аймгийн нутаг дэвсгэрт орших газрын тосны хайгуулын “Баянтүмэн-XYII” талбайд газрын тосны хайгуулын ажлыг хийхээр Газрын тосны газартай байгуулсан “Бүтээгдэхүүн хуваах гэрээ”-г Монгол Улсын Засгийн газар 2010 оны 12 дугаар сард баталж байсан. Энэ гэрээний дагуу 2011 оноос эхлэн газрын тосны хайгуулын ажлыг хийж, нефтийн бүтээгдэхүүнийг дотооддоо олборлох, энэ салбарт гадны хамаарлыг аль болох багасгах зорилгоор нефтийн бүтээгдэхүүнийг боловсруулах үйлдвэрийг байгуулахаар ажиллаж байсан түүхтэй.

---