УИХ дахь Ардчилсан намын зөвлөлийн дарга Д.Эрдэнэбат сонгуулийн хуультай холбоотой намын байр сууриа илэрхийллээ. 

-Сонгуулийн хуулийг Холимог тогтолцоогоор явуулъя гэдэг байр суурь дээрээ Ардчилсан нам хэвээр байгаа. Бусад хувилбар нь эрх баригчдын асуудал. Өнгөрсөн сонгуулиар намын туг, дарцгийг энд тэнд байрлуулж болохгүй гэсэн маргаан өрнөсөн. Ийм жижиг зүйл дээр цаг алдмааргүй байгаа юм. 

Хэд хэдэн санал байна. 

Сонгуулийн сурталчилгааны хугацаа хэт богино байна. Энэ нь шинэ нэр дэвшигчдэд танигдах боломж олдохгүй байна. Тэнцвэртэй бус сонгууль болж байна. 

Шилжилт хөдөлгөөний тухай заалтад өөрчлөлт орсонгүй. "Царцаа" гэж ярьдаг. "Царцаа"-ны тоог хязгаарлах, тоог тогтоох талаар бид саналаа өгнө. 

Тооллогыг машинаар тоолно. 50 хувьд нь хяналтын тооллого явуулна гэсэн байгаа. Хяналтын тооллого дээр баталгаажуулах тооллогыг нэмэх саналтай байгаа. 

Холимог тогтолцоогоор явсан тохиолдолд намын жагсаалтаар нэр дэвших 26 хүний тоог хэрхэн гаргах вэ гэдэг асуудал анхаарал татдаг. Холимог тогтолцоо бол жижиг намуудад боломж олгодог. Бид ҮХНӨ-д энэ саналаа өгсөн боловч харамсалтай нь унасан. Гэтэл мажоритор сонгууль хийхээр жижиг тойрог дээр авлига буурахгүй байна шүү дээ. 

---