412 мянга гаруй иргэнийн хүнсний бүтээгдэхүүний хангамж, чанар, аюулгүй байдалд сөргөөр нөлөөлөх, түгээлтийн автомашины тоо 2-3 дахин нэмэгдэх гэнэ

Энэ оны эхний хагас жилийн байдлаар хүнсний бүтээгдэхүүний ачаа түгээлтийн түр зөвшөөрөлтэй 693 автомашин, түргэн гэмтэж муудах бүтээгдэхүүний 191 автомашин нийт 884 автомашин байгаа юм. Эдгээр машинууд бүгд нэг цагт, нэг газарт очин түгээлт хийхгүй учраас замын ачаалал үүсгэдэг хэмээн ойлгож болохгүй хэмээн Монголын Хүнсчдийн холбооноос мэдэгдсэн. Харин түгжрэлийг бууруулах арга хэмжээг суудлын автомашин руу чиглүүлэх нь оновчтой хэмээн үзэж байгаа юм.

Харин хүнсний үйлдвэрүүдийн түгээлтийн автомашинуудыг цагийн хязгаарлалтад оруулсны улмаас тухайн бүсэд ажиллаж, амьдарч байгаа 412 мянга гаруй иргэнийн хүнсний бүтээгдэхүүний хангамж, чанар, аюулгүй байдалд сөргөөр нөлөөлөх, түгээлтийн автомашины тоо 2-3 дахин нэмэгдэх гэнэ.

Тэгвэл Монголын Хүнсчдийн холбооноос доорх саналыг гаргажээ.

-Их тойруу, 3, 4-р хороололд байрлах хүнсний сүлжээ дэлгүүр, зах, худалдааны төвүүд, бар, ресторан, зочид буудал зэрэг газруудад шөнийн түгээлт хийх боломжтой. Харин жижиг дэлгүүрийн хувьд цагийн хязгаарлалтанд оруулах боломжгүй.

-100 гаруй хүнсний үйлдвэрүүдийн түгээлтийн автомашиныг таван бүлэгт хувааж, долоо хоногийн ажлын өдрүүдийн аль нэг өдөр ээлжлэн зогсолт хийлгэх.

-06.00-16.00 цагийн хооронд ангилан түгээлт хийх боломжтой хэмээн үзэж байгаа юм.

-Хүнсний үйлчилгээний газруудад өдрийн цагаар түгээлт хийхгүй, зөвхөн шөнийн түгээлт хийх боломжтой.

Харин нийслэлээс гаргаж буй 06.00-10.00 цаг, оройн 16.00-20.00 цагуудад борлуулалт түгээлтийн автомашины хөдөлгөөнийг хязгаарлах гэсэн шийдвэрийг хүлээн авч хэрэгжүүлэх боломжгүй гэдгээ мэдэгдсэн юм.

 

---