Байгалийн түүхийн музейг авч үлдэх зорилготой иргэд, төрийн бус байгууллагуудын зүгээс тус барилгыг хүчитгэн засаж, энэ төрхөөр нь хадгалахаар тэмцсэн ч шүүх дээр ялигдсаны улмаас энэ сарын 24-ны өдрөөс тус музейн ар талаас нь нурааж эхэлжээ.

Тэдний зүгээс Захиргааны хэргийн шүүхэд хандаад ялагдсан ч давж шатах шатны шүүхэд хандахаас өмнө Боловсрол, шинжлэх ухаан, спортын яамнаас тус барилгыг нураах шийдвэр гаргасанд харамсаж буйгаа илэрхийлэв.

Соёлын яам нь соёлынхоо өвийн эсрэг үйл ажиллагаа хийж байна хэмээн тус барилгыг хамгаалж байсан хүмүүс дурдав.  

Улаанбаатар хотын музейн эрдэм шинжилгээний ажилтан Г.Очбаяр “Яагаад улсын төв музейн барилгыг авч үлдэх ёстой вэ гэхээр уг музей нь Монголын орчин цагийн хот байгуулалтын түүхийн гэрч болсон архитектурын дурсгал юм. Уг барилгыг 2015 онд соёлын өвд бүртгэж авсан. Байгалийн түүхийн музейг соёлын өвд бүртгэсэн хэд хэдэн шалтгаан бий. Тус музей нь Улаанбаатар хотын орчин цагийн анхны барилгуудын нэг буюу түүхийг гэрчилж буй гол барилга юм.

Хоёрдугаарт, маш гоё хийцтэй, урдаа баганатай бөгөөд үүгээр бол Бага тойруу дахь Улаанбаатар хотын архитектурын чуулга болдгоор онцлогтой. Хот байгуулалт хотын төв, архитектур ой санамж гэсэн дөрвөн чиглэлээр соёлын өв гэдэг нь батлагдаж байгаа юм” гэлээ.

Иргэдийн хувьд илжирсэн барилгыг нураах нь зөв гэж байгаа ч нурааж байгаа дүр зургаас харахад илжирч муудсан мод буулгаж байгаа дү зураг харагдахгүй байна гэсэн юм.

Тэдний зүгээс цаашид ард иргэдэд соёлын өвийн боловсролыг дээшлүүлэх ажил хийх ёстой юм байна гэсэн том сануулга өглөө хэмээв.

---