Энэтхэгийн Дэли хотын Индира Ганди олон улсын нисэх буудалд Леонардо ДиКаприогийн “Чаддаг юм бол бариарай” киног санагдуулам үйл явдал болжээ.

48 настай Ражан Махбубани гэгч эрэгтэй Луфтанза нислэгийн компанийн нисгэгчийн дүрэмт хувцас өмсөж, нисгэгч мэт аяглаж байгаад цагдаа нарт баригдсан байна. Баригдах хүртлээ тэрээр нисэх буудлын ажилчдад заавар тушаал өгч, аюулгүйн шугамаар зорчин өнгөрөөхийг шаарджээ.

Түүнийг Дэлигээс Колката руу явах AirAsia-ын нислэгийн үеэр нисэх буудлын зорчих хаалганы ойролцоогоос барьсан байна. Луфтанза компанийн ажилтан нисгэгчийн дүрэмт хувцастай сэжиг бүхий эрэгтэй явж байгааг аюулгүйн албаныханд мэдэгдсэнээр Махбубанийг баривчлан саатуулжээ.

Нисгэгчийн хуурамч үнэмлэх үйлдсэн байсан нь илэрсэн ба YouTube, TikTok-ын бичлэгээс харж Тайланд улсад дуурайлган хийсэн гэж мэдүүлсэн байна. Мөн цагдаа нарт дүрэмт хувцас өмсөх дуртай учраас ингэж хувцасласан хэмээн ярьжээ. Махбубани гэгч этгээдийн армийн дүрэмт хувцастай авахуулсан зургийг гар утаснаас нь олжээ.

 

 

Дүрэмт хувцастай бол аюулгүйн шугам, шалган нэвтрүүлэх цэгүүдийг түвэггүй өнгөрнө гэж бодсон учраас ийм үйлдэл гаргасан гэж тэрээр мэдүүлсэн байна. Шүүхээс гэм буруутай гэж үзвэл торгуулийн арга хэмжээ авч, жил хүртэл хугацаанд хорих ял оноох юм.

 

Эх сурвалж: www.cnn.com

---