Нийслэлийн иргэд энэ жил утаатай өвөлжих болсныг албан ёсоор мэдэгдье. Учир нь өнгөрсөн жилийн төсөвт агаарын бохирдлыг бууруулах ажлын хүрээнд найман тэрбум төгрөг төсөвлөсөн ажээ. Энэ мөнгөөр бид энэ оны арванхоёрдугаар сарын 31-н хүртэл агаарын бохирдолтой тэмцэнэ. Дээрх мөнгөөр шөнийн цахилгааныг хөнгөлөх, зорилтод бүлгийн иргэдэд сайжруулсан зуух, түлш тараахад зарцуулагдаад дуусаж байгаа юм. Дээрх ажлыг хийснээр агаарын бохирдол 10 хувиар буурна хэмээн үзсэн. Үлдэж байгаа 90 хувийн агаарын бохирдол буюу ph 2.5 тоосонцорт Монгол Улсын иргэдийн нэг сая 400 мянган гаруй иргэд дахин хортохнээ.

2019 оны өвөл утаа 50-60 хувиар буурахгүй бол БОАЖ-ын сайд Н.Цэрэнбат хариуцлага үүрэхээ мэдэгдэв

2019 оны өвөл утаа 50-60 хувиар буурахгүй бол БОАЖ-ын сайд Н.Цэрэнбат хариуцлага үүрэхээ мэдэгдэв. Тэрбээр агаарын бохирдлыг бууруулах чиглэлээр ирэх оны төсөвт тусгасан санхүүжилтийн талаар мэдээлэл хийсэн юм.

Иргэн танд мэдээлэхэд доорх ажил 2019 онд хийх ажлууд гэдгийг анхаарна уу..

-Эрчим хүчний яамнаас цахилгааны шөнийн тарифын хөнгөлөлтөд зориулж 14.7 тэрбум төгрөг.

-Гэр хорооллын 100.000 айлын янданд бүрэн шаталтыг дэмжих шүүлтүүр суулгахад 54 тэрбум төгрөг.

-2019 оны тавдугаар сарын 15-ны өдрөөс эхлэн түүхий нүүрс нийслэлд оруулахыг хориглосон.

-120.000 өрхөд сайжруулсан түлшийг түүхийн нүүрснээс хямдаар борлуулахад татаас олгоход зориулж 54.7 тэрбум төгрөг.

-Нам даралтын 3000 зууханд бүрэн шаталтын дэмжих шүүлтүүр суулгахад зориулж 22.5 тэрбум төгрөг төсөвлөсөн байна.

Улаанбаатар хотын хүн амын 60 гаруй хувь нь буюу 220.000 өрх гэр хороололд амьдарч байгаа. Дээрх өрхийн 100.000-д индукцэн шүүлтүүр суулгах гэнэ. Уг индукцэн нь цахилгаанаар ажиллах бөгөөд тоосонцорыг бүрэн шатаадаг эд юм байна. Уг индукцэн төхөөрөмжийг монгол инженерүүд зохион бүтээж БНХАУ-ын Haier компанид үйлдвэрлэхээр болжээ. Тус компанийн зүгээс 2019 оны төсөв батлагдсан тохиолдолд үйлдвэрлэнэ хэмээн мэдэгдсэн байна.

Харин нам даралтын 3000 зууханд бүрэн шаталтыг дэмжих шүүлтүүр суулгах бөгөөд энэ нь уутан шүүлтүүр ба ph 2.5 тоосонцорыг  98-99 хувиар шүүх гэнэ.

Хурлын үеэр  БОАЖ-ын сайд Н.Цэрэнбат агаарын бохирдлыг бууруулах ажлын хүрээнд жил болгон улсын төсөв мөнгө төсөвлөж ажил хийдэг ч дорвитой өөрчлөлт гараагүй. Иргэдийн хувьд орон сууцжуулах ажил хийх хэрэгтэй хэмээн үзэж байгаа ч энэ ажил 5-10 жил шаардахаар байгаа. Тэгэхээр Орчны бохирдлыг бууруулах үндэсний хороо өнгөрсөн 1 жилийн хугацаанд хуралдаж, утааг ойрын хугацаанд бууруулах хамгийн үр дүнтэй арга нь иргэд гэр, байшингийнхаа дулаан алдагдлыг бууруулах, сайжруулсан түлш хэрэглэх, бүрэн шаталтыг дэмжих төхөөрөмж ашиглах шийдэлд хүрсэн хэмээн дурдсан юм. Яавал олон хүн бага хордох вэ гэдэг дээр анхаарч байгаа. 

Тэрбээр дээрх ажлыг хийж хэрэгжүүлэн ажиллах аваас Улаанбаатар хотын агаарын бохирдол 50-60 хувиар буурах боломжтой, буурахгүй бол би өөрөө хариуцлага хүлээнэ хэмээн мэдэгдсэн юм.

Тэгэхээр БОАЖ-ын сайд Н.Цэрэнбат энэ өвлийн агаарын бохирдолд хариуцлага хүлээхгүй бөгөөд түүний ирэх онд хэрэгжүүлэх ажил бүтэмжтэй байхыг ерөөж байна.

 

---