Korean Air нислэгийн компанийн үйлчлэгч эмэгтэйг өдсөн болон багийн эмэгтэй гишүүдийг хашраан залхаасан хэрэгт холбогдоод буй Монгол улсын Үндсэн Хуулийн Цэцийн дарга Д.Одбаярын хэргийг прокурорт шилжүүлсэн тухай БНСУ-ын эх сурвалжууд мэдээлж байна

Инчон дүүргийн цагдаагийн төв газар өнөөдөр өглөө 52 настай Доржийн Одбаярыг Нисэх хүчний аюулгүй байдлын хууль зөрчсөн, биеэ барьж чадалгүй албадан шаардлага тавьсан зэрэг хэргээр яллах дүгнэлт үйлдүүлэхээр прокурорын байгууллагад шилжүүлжээ.

Одбаяр нь Инчоны цагдаагийн газарт хоёр дахь удаагаа байцаалт өгөхдөө болсон явдлыг санахгүй байна, хэрэв хохирогчийн гомдол гаргаснаар тийм явдал болсон бол согтууруулах ундаа хэрэглэсэн байсантай холбоотой гэсэн хариултыг өгсөн юм.

Солонгос ажилтны биед халдсанаас гадна Korean Air компанид ажилладаг монгол ажилтнуудыг заналхийлсэн хэрэг давхар шалгагдаж байгаа. Одбаяртай хамт аравдугаар сарын 31-ний өдөр Улаанбаатараас Инчоны чиглэлд нисч, өөр нэг үйлчлэгчийн мөрөнд хүрсэн 42 настай иргэн А гэгч нь Инчонд буусан даруйдаа Сингапур улс руу ниссэн.

Түүнийг нэн даруй Солонгост ирүүлж байцаалт авахын тулд Интерполоор улаан түвшинд буюу онц аюултай сэжигтнийг эрэн сурвалжлах заалтаар эрж олох хүсэлтээ БНСУ-ын цагдаа нар тавьжээ.

Монгол улсын хууль эрх зүйн салбарын дээд албан тушаалтан БНСУ-д хэрэгт холбогдсон тухай солонгос иргэдийн санал сэтгэгдэл сошиал орчинд анхаарал татаж байгаа юм. Иргэдийн санал сэтгэгдлийн дийлэнх нь сөрөг утгатай байгаа ажээ.

---