БНХАУ-д насанд хүрээгүй хүүхдүүд видео цахим тоглоомонд олноороо донтож байгаа явдалтай тэмцэхийн тулд Засгийн газар хориг тогтоожээ. Үүнд Хятадын нутаг дэвсгэрт үйл ажиллагаа явуулдаг бүх цахим тоглоомын компаниуд, тэр дундаа Tencent-ийн эзэмшдэг платформууд хамааралтай аж.

Шинэ тогтоосон дүрмийн дагуу

- 18 нас хүрээгүй бүх тоглогч үдшийн 22 цагаас өглөөний 08 цаг хүртэл цахим тоглоомонд нэвтрэх хориотой.

- Ажлын өдрүүдэд хоногт 90 минут буюу цаг хагасаас илүүгүй тоглох ёстой.

- Долоо хоногийн амралтын өдрүүд болон бүх нийтийн амралтаар хоногт дээд тал нь гурван цаг тоглохыг зөвшөөрсөн байна.

- Үүгээр зогсохгүй 8-16 насны тоглогчид сардаа 200 юань буюу 29 ам.доллараас илүү мөнгийг цахим тоглоомын данс руу шилжүүлэх боломжгүй.

- 16-18 настнууд сардаа дээд тал нь 400 юань буюу 57 ам.долларын мөнгөөр гүйлгээ хийж цахим тоглоомын дансанд шилжүүлэх боломжтой болж байна.

Ньюзу судалгааны фирмийн мэдээлснээр Хятад дэлхийн хамгийн том цахим тоглоомын зах зээлтэй орон. Дэлхийн цахим тоглоомын зах зээлээс олж буй орлогын ¼ нь Хятадад бүрддэг байна. 2018 онд тус улсад цахим тоглоомын зах зээлээс 38 тэрбум ам.доллар цуглажээ.

Эрх баригчид ийнхүү хатуу хориг тавьсан нь хүүхдүүдийг сэтгэцийн болон биеийн эмгэг өвчтэй болохоос хамгаалж, интернэтийн орон зайг цэвэрлэх зорилготой гэж Синьхуа мэдээлэв. Дүрэм журмыг хэрэгжүүлэхэд Бээжингийн Засгийн газрын нэгж байгууллагууд хувийн фирмүүдтэй хамтран ажиллаж, хэрэгжилтэд хяналт тавина. Бүртгэлийн системд жинхэнэ нэр хаягаараа холбогдсон эсэх, хэрэглэгчдийн мэдээллийг шалгах зэрэгт цагдаагийн байгууллага хамтарна.

Цахим тоглоомонд донтох нь хүүхдийн сургуульд сурах, гэр бүлийн харилцаа зэрэг бусад нийгмийн хүсэл сонирхлыг хаан боогдуулж, албадан орхигдуулдаг гэж олон улсын байгууллагууд үзсэн байдаг юм.

 

Эх сурвалж: www.cnn.com  

---