Францын залуу жүжигчин бүсгүй Адель Хенель 12 настайдаа анхны кинондоо байжээ. Гэвч энэ үед түүнтэй хамтран ажиллаж байсан найруулагч нь бэлгийн дарамтанд оруулж байсан тухай олон нийтэд дэлгэжээ. Тэрээр энэ жил 30 настай бөгөөд Францын оскар гэгддэг Цезарийн шагналын эзэн юм.

Хенелийг 12-15 нас хүртэл түүний найруулагчаар ажиллаж байсан Францын шилдэг найруулагчдын нэг Кристоф Ружжа байнгын бэлгийн халдлага, дарамтад оруулж байсан гэв. Тухайн үед жүжигчин бүсгүй The Devils кинонд аутизмтай охины дүрд тоглож байжээ.

Жүжигчин бүсгүй Францын Медиапарт эрэн сурвалжлах вебсайтад энэ тухайгаа ярьжээ. Найруулагч Ружжа Хенелийг өсвөр насны охин байхад нь хүзүүн дээрээ үнсэхийг хүчээр шаардаж, бие гуянд нь байнга хүрдэг байсан гэжээ. Эдгээр үйл явдлууд найруулагчийн хувийн орон сууц, олон улсын кино наадамд явах үеэр давтагдсан тухай жүжигчин хэлсэн байна.

Харин найруулагч 54 настай Кристоф Ружжа үүнийг эрс үгүйсгэж, өмгөөлөгчдийнхөө хамт хэргийг няцааж, эндүү ташаа ойлголтыг засна гэжээ.

 

 

Медиапарт вебсайтын шууд дамжуулалтаар энэ тухайгаа ярихдаа Хенель “ийм тохиолдолд чимээгүй өнгөрдгийг таслан зогсоох хэрэгтэй. Мангасууд хүүхдүүдийн эргэн тойронд байж болохгүй. Энэ бол бидний оршин тогтнож буй нийгмийн тухай яриа. Энэ явдлыг хүлээн зөвшөөрч, аль эсвэл дахин давтах ёсгүй” гэжээ.

Дэлхий дахинд попын хаан хэмээн хүлээн зөвшөөрөгдсөн нэрт дуучин Майкл Жэксон бага насны хүүхдийг хүчирхийлэгч байсан тухай Leaving Neverland баримтат киног үзсэнийхээ дараа Хенель өөрт тохиолдож байсан явдлыг олон нийтэд дэлгэхээр шийдсэн байна.

Ружжа долоо хоног бүрийн амралтын өдөр Хенелийг ганцаарчлан авч үлддэг байсан ба 12-15 настай охинтой 40 настай эр хоёулахнаа үлдэж түүнд хүрэхийг завдах нь бэлгийн дарамт мөн бөгөөд тэр үед би буйдан дээр хөшсөн мэт суудаг байсан хэмээн жүжигчин эмэгтэй ярьсан байна. Энэ талаарх мэдээллийг нийтэлсэн эрэн сурвалжлах сайт The Devils кинонд хамтран ажилласан олон хүнтэй ярилцаж үзэхэд ихэнх нь найруулагчийн Хенельд гаргаж буй хандлагад сэтгэл зовдог байсан тухайгаа хэлжээ.

Франц улсын кино найруулагчдын нийгэмлэг уг хэргийг шударгаар шийдэхэд жүжигчин бүсгүйд туслахаа мэдэгдсэн байна.

 

 

Эх сурвалж: www.theguardian.com

---