Австралийн иргэн арын хашаанаасаа тэнэмэл гөлөг олсон нь ховор тохиолдох 100 хувь цэвэр цусны зэрлэг нохой динго үүлдрийнх байсныг олж мэджээ. Нэг нас ч хүрээгүй бяцхан гөлөг хаанаас гарч ирсэн нь тодорхойгүй ба магадгүй аварга биет махчин шувуу үлдээсэн байж болох юм.

Гэрийн эзэд түүнийг Ванди хэмээн нэрлэжээ. Австралийн динго зэрлэг нохойн сангийн захирал Лайн Ватсон 100 хувь цэвэр цусны динго нохойн гөлөг олдоно гэдэг маш ховор бөгөөд Ванди тус үүлдрийн нохдыг хамгаалах хөтөлбөрт маш чухал хувь нэмрээ оруулна хэмээн найдаж байгаагаа илэрхийлжээ.

 

 

Олон мянган жилийн өмнө Европчуудыг тус тивд ирэхээс өмнө динго ноход уутат имжний тоо толгойг хэт ихсэхээс сэргийлж, байгалийн тэнцвэрт байдлыг хадгалахад чухал хувь нэмэр болдог байжээ. Австрали тивээс гаралтай боловч хотжилт бий болж, тэднийг агнаж эхэлснээр тоо толгой нь цөөрчээ. Тиймээс эндэхийн байгаль хамгаалах газар уг үүлдрийн нохдыг устахад ойрхон амьтдын төрөл зүйлд багтаасан байна.

 

 

Ванди гөлөг өнгөрсөн наймдугаар сард Викториа мужийн Вандилинонг жижиг тосгоноос олдсон юм. Түүнийг олсон эмэгтэй цовоо сэргэлэн байсан ч нуруунд нь шарх үүссэн байгааг харж эмнэлэгт аваачжээ. Уг шархыг ямар нэг том шувуу түүнийг идэхээр авч яваад замдаа алдсанаас үүссэн байж магадгүй гэж үзжээ. Тэнэмэл гөлгийг цэвэр цусных гэдгийг батлах ДНХ-ын шинжилгээг илгээснээс найман долоо хоногийн дараа хариу нь гарсан байна.

 

 

Эх сурвалж: www.cnn.com

---