Баянгол дүүргийн эрүүгийн хэргийн анхан шатны шүүхэд өнөө өглөө 08.30 цагаас эхэлсэн Ц.Сандуй, А.Ганбаатар нарт холбогдох шүүх хурал нотлох баримтыг шинжлэн судлах шатандаа оржээ. Үүнээс үзвэл уг шүүх хурал өнөөдөртөө багтааж таслан шийдэгдэх бололтой. Нийслэлийн прокурорын газраас А.Ганбаатар, Ц.Сандуй нарыг “60 тэрбум”-ын хэрэгт холбогдуулан 2002 оны Эрүүгийн хуулийн тусгай ангийн 82 дугаар зүйлийн 82.1 дэх хэсэгт зааснаар “Төрийн эрх мэдлийг хууль бусаар авах хуйвалдаан зохион байгуулах” гэмт хэрэгт яллах дүгнэлт үйлдэж шүүхэд шилжүүлээд байгаа билээ. Шүүхээс тэднийг гэм буруутай гэж үзвэл 20 хүртэлх жилийн хорих ял сонсох юм.

---