БНХАУ-ын 800 гаруй иргэнийг саатуулж байгаа асуудалтай холбогдуулан Тагнуулын Ерөнхий Газрын дарга Д.Гэрэлээс тайлбар авлаа. Түүний хэлж буйгаар хятад иргэд өнгөрсөн 8-р сараас хойш жуулчны визээр орж иржээ.

Тагнуулын ерөнхий газрын дарга Д.Гэрэл:

-Одоогоор БНХАУ-ын 800 гаруй иргэн байна. Тэднийг зохион байгуулж байгаа хүмүүс нь тодорхой. Зохион байгуулсан хүмүүсийг саатуулан байцааж байна. БНХАУ-ын дөрөв, манай улсын нэг иргэн дээрх ажлыг зохион байгуулсан. Мянгаад компьютер, гар утасны арван мянгаад сим карт ашигласан байна. Мөн хэд хэдэн сайтууд ашигласан байна.

Мөнгө угаах гол зорилготой байсан гэж эхний ээлжинд дүгнэж байгаа. Хятад иргэд 8-р сараас хойш хорь, гучаараа цувж орж ирсэн байна. Гэхдээ айх зүйл байхгүй. Бүгд хяналтанд байгаа. Эдгээр иргэдийн хамгийн гол зөрчил нь жуулчны визээр орж ирж ажил хийсэн. Тиймээс албадан гаргах бүрэн боломжтой. Үүнд БНХАУ-ын элчин сайдын яам ч дэмжлэг үзүүлэн хамтран ажиллахаа мэдэгдсэн.

Гар утасны сим карт ямар ч хараа, хяналтгүй зарагдаж, тархаж байгаа нь ихээхэн асуудал болж байгаа юм. Уг асуудалтай холбогдуулан үүрэн телефоны зарим оператор компаниуд, байрлуулсан зочид буудлуудыг ч шалгана.

Дээрх хятад иргэд Юнион, Амар, Кентавр, Орентал зэрэг зочид буудлуудад байрлаж байсан бөгөөд ямар үүрэн телефоны сим карт ашиглаж байсныг хараахан мэдээлээгүй байна. 

---