Өнөөдөр шинэ долоо хоног эхэлж байна. Тогтсон заншил ёсоор бид энэ долоо хоногт олон улсад болох онцлох үйл явдлуудыг нэрлэж байна. 

1.    Лхагва гаригт Бельгийн нийслэл Брюссель хотод Европын холбооны удирдагчид уулзана. Энэ уулзалтаар Их Британийн Засгийн газар Брексит дээр Европын холбоотой тохиролцолд хүрч магадгүй хэмээн найдаж байна. Өнгөрсөн долоо хоногт Их Британи Европын холбооноос өрх тусгаарлах ажил бүрэн цэгцрэх ёстой байсан ч Умард Ирланд болон Бүгд Найрамдах Ирландын хил дээр шалгах асуудал гарсан юм.

2.    Утга зохиолын салбарын шилдэг шагнал болох “Man Booker”-ын эзнийг маргааш тодруулна. Шагналын эзэн 66,000 долларын гардан авна. Англи хэл дээрх шилдэг зохиолын шагналыг өнгөрсөн жил “Бардо дахь Линколн” зохиолоороо Жорж Саундерс авсны дараа борлуулалт нь мянга гаруй хувиар өссөн юм.

3.    Ирэх бямба гарагт Афганистанчууд Парламентын сонгуульд саналаа өгнө. Энэ удаагийн сонгууль Афганистанчуудын хувьд цаашид чөлөөт, ардчилсан сонгууль явуулж болох эсэхийг шалгах чухал шалгуур юм. Парламентын сонгууль гурван жилийн өмнө болох ёстой байжээ.

4.    Канад улс каннабис буюу марихуаны төрлийн ургамлыг хуулийн дагуу худалдаалдаг болно. Шинэ хууль лхагва гарагаас хэрэгжиж эхэлнэ. Дэлхий даяар энэ төрлийн ургамлыг гэмт хэргийн шинж чанартай гэж үзэн худалдаалахыг хориглосон байдаг. Харин Канад улс хуулийн дагуу борлуулахыг зөвшөөрсөн ердөө хоёр дахь улс юм. Өмнө нь 2013 онд Уругвай улс марихуаны хэрэглээг зөвшөөрсөн дэлхийн анхны улс болж байжээ.

5.    Шархадсан цэргийн албан хаагчид, ахмад дайчдад зориулсан “Инвиктус” Паралимпын наадам ирэх амралтын өдрүүдэд Австралийн Сидней хотод эхэлнэ. Долоо хоног үргэлжлэх наадамд дэлхийн өнцөг булан бүрээс цугласан дайчин тамирчид 11 спортын төрөлд өрсөлдөх юм. Их Британийн хунтайж Харри 2014 онд уг наадмыг санаачилж байжээ.

Эх сурвалж: www.bbc.com 

---