Монголын ноос ноолуурын салбарын анхдагч “Говь” ХК-ийн үйлдвэрийн дээврийг засаж байсан гэрээт компанийн ажилчид гал алдсанаас 2017 оны 6 сарын 15-ний өдөр тус үйлдвэрийн дээвэр бүхэлдээ шатсан осол гарч байсан билээ. Галын улмаас хүний амь нас хохироогүй. Үндсэн хийцэнд өөрчлөлт ороогүй тул ослын хохирлыг түргэн шуурхай засаж хэвэнд нь оруулсан байдаг.

Үндэсний томоохон аж ахуйн нэгж “Таван богд групп” ХХК-ийн эзэмшлийн тус компанийн галын дуулиан намжаагүй байтал охин компани дээр нь туслан гүйцэтгэгчтэй холбоотой бас нэгэн ноцтой хэрэг амралтын өдрүүдэд гарлаа.   

Ноос ноолуурын тэргүүлэх хоёр компанийн нэг “Гоёо” ХХК дээр 12-13-нд шилжих шөнө барилгын ажил гэрээгээр гүйцэтгэж байсан компанийн 17 ажилтан үл мэдэгдэх хийнд хордсоноос 38 настай залуу эмнэлгийн тусламж авч чадалгүй нас барсан хэрэг гарчээ. Одоогоор Хордлогын яаралтай тусламжийн төвд дөрвөн хүн хэвтэж эмчлүүлж байгаа бөгөөд нэг нь хүнд, нэг нь хүндэвтэр, хоёр нь хөнгөн хэлбэрийн хордлоготой эмчлүүлж байна.

Эмч нарын мэдээлж байгаагаар нүүрс хүчлийн дутуу ислийн хийнээс болж хордсон гэж таамаглаж байгаа аж. Яг юунаас болж хордсоныг эмнэлэг, мэргэжлийн хяналт, цагдаагийн хамтарсан ажлын хэсэг шалгаж байна.

Хөдөлмөр аюулгүй байдал нэгдүгээр тавигддаг. “Таван богд групп” ХХК-ийн хувьд туслан гүйцэтгэгч компаниудын ажилчдад Хөдөлмөр, аюулгүй байдлын сургалтыг сайтар орох, хууль дүрмийг чанд сахиулах, стандартыг мөрдөж ажиллах даалгавартай үлдэж байна.

---