Улсын тэргүүний Нэгдүгээр сургуулийн багш нар өнөөдөр хэвлэлийн бага хурал хийлээ. Тэд тус сургуулийн сурагчид нь Үдийн цай хөтөлбөрөөс хордсон гэх асуудлыг дэлгэн тавьсан юм  

Нэгдүгээр сургуулийн багш Ч.Чагцал:

"ТТ фүүдс" ХХК нь хаяг, шошго нь мэдэгдэхгүй хатсан боов, хэзээ үйлдвэрлэсэн нь тодорхойгүй жүүс өгч байна. Үүнээс болж нэг ангийн гурван хүүхэд маань өвдсөн. Гэвч манай сургуулийн захирлын үүрэг гүйцэтгэгч Д.Цогзолмаа Үдийн цайны талаар ярьж болохгүй гэж багш нарын үг хэлэх эрхийг хянаж, цагдаж байна. Мэргэжлийн хяналт дуудаж шалгаж өгөх хүсэлт тавьсан ч н.Отгонбор гэдэг байцаагч үдийн цайнд өгч байгаа бүтээгдэхүүнийг шалгах бус хүүхэд өвдсөн нь үнэн үү гэдгийг мөрдөөд явж байна" гэлээ.

Ч.Энхнасан 1-р сургуулийн багш:

"10 сарын 1-нд Үдийн цай тарааж эхэлсэн. 10 сарын 2-ны өглөө хоёр эцэг эх хүүхэд нь өвдсөн, бөөлжөөд хичээлдээ явж чадахгүй байгаа талаар ярьсан. Өдөр дахиад нэг аав ярьсан. Мөн л хүүхэд нь ямар нэгэн зүйлээс хордсон бололтой бөөлжөөд, гүйлгээд байгаа талаар хэлсэн. Ингээд би захиралдаа хэлсэн. Тэгээд мэргэжлийн хяналтын байцаагч н.Отгонбор гэдэг хүн ирсэн. Гэвч тэр байцаагч анги удирдсан багшид ёсзүйн хариуцлага тооцохоор болсон тухай хэлсэн" гэлээ.

Багш нарын үйлдвэрчний эвлэлийн УЗ-ийн гишүүн Д.Мөнхбаатар:

"Багш нарын үйлдвэрчний эвлэлээс 1-р сургуулийн асуудлаар Нийслэлийн засаг даргын орлогч Ш.Анхмаад шаардлага хүргүүлсэн. Энэ дагуу ажлын хэсэг байгуулсан ч ажлын хэсэгт орсон арван хүний тав нь ашиг сонирхлын зөрчилтэй гэж үзэж байна. Бүгд хамран сургах тойргийн бус хүүхэд шахсан. Мөн 1-р сургуулийн захирлын түр орлон гүйэтгэгч Д.Цогзолмаа хүүхдүүдээс хууль бусаар мөнгө хурааж багш нарын баярт зарцуулсан. Энэ асуудалтай бид тэмцэх болно" гэлээ.

 

---