Энэ оны эхний аравдугаар сарын байдлаар 500 гаруй хүүхэд гэмт хэрэг үйлдэж, мянга гаруй хүүхэд гэмт хэргийн улмаас хохирсон байна. Тодруулбал, хүүхдүүд ихэвчлэн зодолдох, танхайрах, булаах, хүчиндэх гэмт хэргийн хохирогч болж байна.

Хүүхдийн эсрэг гэмт хэргээс урьдчилан сэргийлэх, бууруулах чиглэлээр олон ажил, арга хэмжээг тогтмол зохион байгуулж байгаа боловч хангалттай үр дүнд хүрэхгүй байгааг холбогдох байгууллагууд дурдаж байгаа юм. 

Иймээс насанд хүрээгүй хүүхдүүдийг гэмт хэргээс урьдчилан сэргийлэх үүднээс Цагдаагийн ерөнхий газрын санаачлагаар “Хүүхдийн  эрх, аюулгүй байдлыг хангахад анхаарах асуудал” сэдэвт эрдэм шинжилгээний хурлыг өнөөдөр Төрийн ордонд зохион байгууллаа.

 Хүүхдийн эсрэг гэмт хэргийг насанд хүрсэн хүмүүс гэр бүлийн орчинд, гудамж талбайд, боловсролын орчинд үйлддэг байна. Иймээс эцэг, эхчүүд болон боловсролын байгууллагын төлөөллүүдэд хүүхдийн эсрэг гэмт хэргийг хэрхэн таньж мэдэх, урьдчилан сэргийлэх, гэмт хэрэг үйлдсэнээр хууль эрх зүйн ямар хариуцлага хүлээх талаар эрдэм шинжилгээний бага хурлын үеэр ярилцлаа.

---