Дэлхий даяар 2019 оны есдүгээр сард цаг агаарын температур тэмдэглэж эхэлснээс хойш хамгийн халуун өдрүүд үргэлжилсэн гэдгийг судлаачид тогтоожээ.

Өнгөрсөн есдүгээр сарын дунджаар дэлхий даяар агаарын температур цельсийн +0,57 хэм байсан нь 1981-2010 хүртэл жилүүдийн есдүгээр сарын дунджаас дулаахан байгаа юм. Тэр дундаа Европ тив, АНУ-ын төвийн болон зүүн мужууд, Монголын тал нутаг, Арктикийн бүсэд илүү халжээ.

Европын өмнөд, зүүн өмнөд нутагт өмнөх жилүүдийн есдүгээр сарын дунджаас өндөр халсан байгаа бол Норвеги, Швед, Орост сарын дундаж температур жирийнээс бага буюу эсрэгээрээ сэрүүхэн байжээ.

Иран, Афганистан, Хятадын хойд нутаг, Өмнөд Америк, Өмнөд Африк, Австралийн баруун өмнөд хэсэг төдийгүй Монголд цаг уур дулаахан байсан гэдгийг судлаачид онцолжээ. 2016 оны есдүгээр сар хамгийн халуун байсан гэж тодорхойлж байсан бол 2019 он үүнээс цельсийн +0,02 хэмээр дулаахан байж хамгийн халуун нь болов. Харин хоёрдугаарт орж байсан 2017 оны есдүгээр сар ухарч гуравдугаарт бичигдэж байна.

Түүнчлэн 2018 оны 10 дугаар сараас 2019 оны есдүгээр сар хүртэл 12 сарын хугацаа 1981-2010 он хүртэл жилийн дунджаас +0,55 хэм дулаахан байжээ.

 

Эх сурвалж: www.iflscience.com

---