Урлагт бүх насаа зориулж яваа дуусч дундаршгүй эрч хүчтэй МУГЖ, НҮБ-ийн хүүхдийн сангийн элч дуучин Т.Ариунаа ирэх арваннэгдүгээр сарын 8-нд “Тэнгэр шиг бай” шоу тоглолтоо “Буянт-Ухаа” спортын ордонд хийхээр болсон.

“Тэнгэр шиг бай” бүрэн хэмжээний шоу тоглолтын хэвлэлийн бага хуралдаа дуучин маань найз нөхөд, үнэнч фэнүүд, хэвлэл мэдээллийн байгууллагын сэтгүүлч нарыг энэ сарын 9-ны 11:00 цагт The Corporate Convention Centre-т урьжээ.

Тэрбээр 15 настай байхдаа “16 нас” хэмээх анхны дуугаа дуулснаар урлагийн замнал нь эхэлсэн юм. Гал цогтой, дайчин энэ бүсгүйн дуулсан дуу бүхэн хит болж, ард түмний хайртай дуучны нэг болсон билээ. Тиймээс ч “Тэнгэр шиг бай” тоглолт гурван цаг үеийн илэрхийлэлтэй, мэргэжлийн академик тоглолтыг үзэгчдэд харуулна гэдгээ амлалаа.

Тоглолтын өмнө ямар нэгэн хамтлаг, дуучид дуулахгүй бөгөөд хамтран дуулах дуучдаа өөрөө сонгох зэрэг тоглолтын сонирхолтой мэдээллийг маргааш болох хэвлэлийн бага хурлын үеэр мэдэх боломжтой.

Манай www.livetv.mn сайт Т.Ариунаагийн “Тэнгэр шиг бай” шоу тоглолтын хэвлэлийн бага хурлыг 11:00 цагаас үзэгч танд шууд дамжуулан хүргэнэ.

---