Энэтхэгийн Керала мужийн оршин суугч гэр бүлийнхээ зургаан гишүүний хоолонд цианид хийж хордуулж амь насыг нь хороосон гэдгээ хүлээн зөвшөөрчээ.

Цагдаа нар оны эхэнд нэг айлын зургаан хүн хордож амь насаа алдсан хэргийг мөрдөн шалгаж эхлэхдээ эмэгтэйн 47 настай хүргэн ахын өгсөн мэдүүлгээр Жолли Томасыг сэжиглэж шалгах болсон байна. Сэжигтэй эмэгтэй хамгийн бага нь хоёр настай байсан гэр бүлийн гишүүдийг үхэх бүрт дэргэд нь цуг байсан ба хохирогчид бүгд түүний бэлдсэн хоолыг идсэн гэдгийг тогтоожээ.

Томасыг уг гэр бүлийн хөрөнгө, байшинд шунаж хэргийг үйлдсэн гэж үзсэн байна. Цагдаагийн мэдээллээр хамгийн түрүүнд хордсон хүн Томасын хадам ээж бөгөөд 2002 онд хонины махтай шөл идсэнийхээ дараа амьсгал хураажээ. Харин 2008 онд хадам аав нь, 2011 онд нөхөр нь карритай будаа идсэний дараа нас барсан байна.

 

 

Задлан шинжилгээгээр тэдний гэдэс дотроос хорт бодис илрүүлж байсан ч цагдаа нар нөхрийг нь амиа хорлосон байж магадгүй үзжээ. Гэтэл 2014 онд Томас нас барсан нөхрийнхөө үеэл Скариа Шажугийн хоёр настай охиныг хороож, 2016 онд түүний эхнэрийг хороон тэр жилдээ Шажутай хуримаа хийсэн байна.

Шажу цагдаа нарт өгсөн мэдүүлэгтээ Томасыг эдгээр үхлүүдийн ард байгаа гэдгийг огт мэдээгүй гэжээ. Өнгөрсөн баасан гарагт цагдаа нар нас барсан гэр бүлийн гишүүдийн хүүрийг дахин шинжилж тэд бүгд цианид идэж хордсоныг нотолсон ба энэ даваа гарагт Томас хэргээ хүлээсэн болохыг албан ёсоор мэдэгдсэн байна.

 

Эх сурвалж: www.theguardian.com

---