Их Британийн хатан хааны гэр бүлийн шинэхэн гишүүн Сассексын гүнгийн авхай Меган Мэрклийн хувийн захидлыг The Mail on Sunday сонин олон нийтэд дэлгэсэн. Ханхүү Харри болон түүний гэргий Мэркл нар хувийн захидлыг олон нийтэд дэлгэх нь хууль бус үйлдэл гэж үзсэн учраас зарга үүсгэхээр болсон гэдгээ мэдэгдлээ. Тэд хэвлэлийнхний хэрцгий суртал ухуулгын эсрэг арга хэмжээ авах болно гэжээ.

Ханхүү Харри “би ээжийгээ алдсан, одоо тэд миний эхнэрийг түүнтэй ижил байдлаар хохирогч болгож байгааг харж байна. Гашуун түүх давтагдахвий гэхээс маш их эмээж байна” хэмээн ярьсан байна.

Шиллингс хуулийн фирм гүнгийн авхайн хэрэг дээр ажиллаж байгаа бөгөөд тус сониныг болон толгой компанийг хувийн мэдээллийг хууль бусаар ашигласан, зохиогчийн эрх зөрчсөн, 2018 оны Мэдээллийн аюулгүй байдлын хуулийг зөрчсөн гэх үндэслэлээр Дээд шүүхэд гомдол гаргажээ.

 

 

Харин сонины төлөөлөгчийн хэлснээр өөрсдийн нийтэлсэн мэдээллийг хамгаалж байр сууриа хатуу хамгаална гэжээ.

Их Британийн хатан хааны гэр бүл хэвлэл мэдээллийн хэрэгслийн эсрэг хууль эрх зүйн арга хэмжээ авч буй тохиолдол анхны биш юм. Харригийн ах Кэмбрижийн гүн Уильям болон гүнгийн авхай Кэйт Мидлтон нар Францын Closer сэтгүүлд 2012 онд Мидлтоны цээж нүцгэн зургийг нийтэлсний эсрэг 2017 онд зарга үүсгэн 100,000 еврогийн торгууль оногдуулж чадсан билээ. Францын шүүх сэтгүүлийн хамт олныг хувийн орон зайд халдсан гэж үзсэн байна.

Ханхүү Харри үрэглжлүүлэн ярихдаа сонинд нийтлэгдсэн зүйл худал хуурмаг гэдгийг хэлж, худал хуурмагийн эсрэг хос зоригтой тэмцэнэ гэлээ. Харри болон Мэркл нарын хувийн захидлыг нийтлэхдээ сонины зүгээс утга агуулга бусад зүйлийг өөрчилсөн гэж буруутгаж байна.

 

 

Эх сурвалж: www.bbc.com

---