Баян-Өлгий аймгийн Цэнгэл сумын Цагаан гол багийн “Алтай таван богд” ууланд /аймгийн төвөөс зүүн хойд зүгт 250 км-т, сумын төвөөс зүүн хойд зүгт 180 км-т/ АНУ-ын харьяат иргэн П /40 настай, эрэгтэй / 2019 оны есдүгээр сарын 18-ны өдөр “Алтай таван богд” ууланд авиралт хийжээ.

Харин есдүгээр сарын 20-ны өдөр буцаж ирэх байсан боловч ирээгүй тул аялал жуулчлалын “Altai nomads travel” ХХК-ийн ажилтан К энэ сарын 21-ний өдрийн 22:11 цагт аймгийн Онцгой байдлын газарт мэдээлсэн байна. Тус аймгийн Онцгой байдлын газрын Эрэн хайх, аврах бүлгийн 9 алба хаагч, 1 автомашинтай 09.22-ны өдрийн 05:00 цагт “Алтай таван богд” уулын чиглэлд эрэн хайх ажиллагааг явуулсан байна.

Тэгвэл эрэн хайх ажиллагааг энэ сарын 29-ний өдөр зогсоосон гэх мэдээллийн дагуу Онцгой байдлын ерөнхий газраас тодруулахад “АНУ-ын жуулчны хувьд уул руу гарсан ул мөр олдоогүй тул ууланд хайх үйл ажиллагааг зогсоосон. Тэрнээс бол эрэн хайх ажиллагаа үргэлжилж байгаа” гэх мэдээлэл өгөв.

Ингээд бид илүү дэлгэрэнгүй мэдээллийг эрлийг үйл ажиллагааг зохион байгуулсан Баян-Өлгий аймгийн Онцгой байдлын газрын албан хаагчтай утсаар холбогдон мэдээлэл авлаа.

-АНУ-ын иргэнийг ууланд хайхаа больсон гэсэн. Эрлийн үйл ажиллагааны талаар мэдээлэл өгөөч?

-АНУ-ын иргэн П түүнээс гадна таван жуулчин, нэг хөтөчтэй “Алтай таван богд”-ын Малчны оргилд /4050 метр/ энэ сарын 19-нд гарахаар болж, 18-ны өдөр нь уулын хормойд хоносон. АНУ-ын иргэний хувьд ганцаараа Малчны оргилд гарна гэж зөвшөөрөл авсан юм билээ. Тухайн үед “Altai nomads travel” ХХК-ийн таван жуулчин, хөтөч тус ууланд гарахаар болж, хамт хоноглосон гэсэн. Гэвч өглөө АНУ-ын иргэн майхнаа хураан явсан байсан гэсэн. Жуулчдын хувьд тухайн иргэнийг Малчны оргил руу эртхэн босоод авирсан байна гэж ойлгосон. Гэвч тухайн жуулчид Малчны оргилд авирахад замд тааралдаагүй бөгөөд тус оргилд гарсан шинж байгаагүй. Мөн АНУ-ын иргэнийг хүргэж ирсэн автомашины жолоочид тэрбээр “Би ууланд авираад энэ сарын 19, 20-нд ирнэ. Намайг хүлээж байгаарай хэмээн” хэлсэн байна. Ингээд заасан хугацаандаа ирээгүй тул энэ сарын 21-ний 22:00 цагийн үед манай Онцгой байдлын газарт дуудлага өгсөн.

Баян-Өлгий аймгийн онцгой байдлын есөн бүрэлдэхүүнтэй баг энэ сарын 22-26-н хүртэл тав хоногийн турш Алтай таван богдын Малчны оргил, Хүйтний оргилд эрлийн үйл ажиллагааг хийхэд ямар ч ул мөр олдоогүйгээс гадна харсан үзсэн хүн байгаагүй. 

Ууланд эрлийн үйл ажиллагааг явуулах үед цас бууж ирсэн, цуурсан зүйл байгаагүй тул уулан дахь эрлийн үйл ажиллагааг зогсоож, Алтай таван богд уулын ойр хавьцаа газар нутгаар эрэн хайх ажиллагааг явуулж байна.

-АНУ-ын иргэний ар гэрийнхэн нь асуусан уу?

-Одоогоор ар гэрийнхэн нь гэж холбогдоогүй. Цагдаагийн байгууллагад бүртгүүлсэн. Цаашаагаа АНУ-ын элчин сайдын газарт хандсан байх. Алтай таван богд уул нь улсын тусгай хамгаалалттай учир ууланд авирахаар бол заавал зөвшөөрөл авах ёстой. АНУ-ын иргэний хувьд Баян-Өлгий аймагт үйл ажиллагаа явуулдаг “Altai nomads travel” ХХК-иас ууланд авирах зөвшөөрөл гуйж авсан гэсэн.

Уул нь Малчны оргил руу дээрх таван жуулчинтай хамт гарна гэсэн боловч гараагүй. Тухайн жуулчид, хөтчийн хувьд ууланд гарсан мөр байгаагүй гэх зэрэг мэдээллээс харахад учир битүүлгээр алга болоод байна.

Ингээд бид “Altai nomads travel” ХХК-тай холбогдоход “Манай албан ёсны жуулчин биш. Манай жолоочтой тохиролцон Малчин оргил руу авирахаар болсон юм билээ. Одоогоор ар гэрийнхэн болон Элчин сайдын яамнаас мэдээлэл ирээгүй. Цагдаагийн байгууллагад бол хандсан” хэмээв.

АНУ-ын иргэний ар гэрийнхэн сураглаагүй гэсэн мэдээллийн дагуу бид АНУ-ын Элчин сайдын яамтай холбогдоход “Бид таны мэдээллийг нягтлан шалгаад хариу өгье” гэсэн юм.

---