Өнгөрсөн амралтын өдөр болсон UFC 229 тулаанаар Хабиб Нурмагомедов Ирланд тулаанч МакГрегорыг ялж аваргын бүсээ хамгаалсан ч тулааны дараа болсон зодооны тухай асуудал намжаагүй байна. Тулааны дараа болсон зодооны тухай Дагестан гаралтай Оросын тулаанч Хабиб хэвлэлийн хурал хийж болсон явдалд харамсахгүй байгаагаа илэрхийлсэн.

 

 

Тэрээр “Зарим хүмүүс намайг буруу зүйл хийсэн, зарим нь зөв зүйл хийлээ гэж хэлсэн. Хэн ч бүргэдийг торонд хорьж чадахгүй гэдгийг би тэдэнд харуулсан. Би өдөр бүр бурхнаас намайг тэр алиалагчтай хамт дэвжээн дээр үлдээгээч гэж залбирдаг байсан” гэж ярьжээ. МакГрегор болон түүний багийнхан Хабибын гэр бүл, шашин шүтлэгийг доромжилсны дараа байдал хурцадсан бөгөөд энэ талаар “Миний ард түмэн тэдний хүмүүсээс өөр гэдгийг харуулахыг хүссэн” гэжээ.

 

 

Невада мужийн тамирчдын хорооноос дээрх зодооны хэргийг мөрдөн шалгаж зохих шийтгэлийг онооно гэдгээ мэдэгдсэн. Ирланд тулаанч, UFC-ын хоёр жинд аварга болсон анхны тамирчин Конор МакГрегор зодооны дараа Хабибтай дахин тулалдах хүсэлтээ удаа дараа илэрхийлээд байгаа. Гэсэн ч UFC холбооны тэргүүн Дана Уаит МакГрегор, Хабиб нарыг дахин тулалдуулах боломжгүй гэж мэдэгджээ.

 

 

Харин МакГрегорын багийнхан тэднийг дахин тулалдуулбал холбоонд эдийн засгийн ашигтайн дээр үзэгчдэд сонирхолтой гэжээ. Мөн Невадагийн тамирчдын хороо Хабибыг хөнгөн шийтгэнэ гэдэгт найдаж байна гэдгээ илэрхийлсэн байна.

Орос, Ирландын холимог тулаанчдын хэргийг ирэх сар хүртэл шийдэхгүй юм байна. Буруутай нь тогтоогдвол тулаанаас түр завсарлах, торгууль ноогдуулж шийтгэнэ гэжээ. Шинжээчдийн таамгаар Хабибыг 4-6 сар тулалдах эрхийг нь хасч, 250,000 доллараар торгож магадгүй.

Эх сурвалж: www.theguardian.com, www.express.co.uk

 

---