АТГ-аас Эрүүл мэнд, нийгмийн даатгалын ерөнхий газрын дарга Ч.Алтанхуяг болон тус байгууллагын удирдах хоёр албан тушаалтны хамт энэ сарын 09-ний орой дайчлан баривчилсан гэдгээ мэдэгдсэн. Хойшлуулашгүйгээр дайчлан баривчилснаас хойш 48 цагийн дотор тухайн хэргийг хянаж буй прокурор үргэлжлүүлэн хорих саналаа харьяа шүүхэд хүргүүлж шийдвэрлүүлэх хуулийн заалттай.

Ч.Алтанхуяг нарын гурван сэжигтнийг үргэлжлүүлэн хорих санал аль шүүхэд ирснийг албаны эх сурвалжаас тодруулахад “Одоогоор үргэлжлүүлэн хорих саналаа прокурорын байгууллагаас шүүхэд ирүүлээгүй байна. Хуулийн хугацаа өнөөдөр дуусах учраас удахгүй ирүүлэх байх. Прокурорын зүгээс үргэлжлүүлэн хорих саналаа Баянзүрх, Чингэлтэй, Сүхбаатар дүүргийн Эрүүгийн хэргийн анхан шатны шүүхэд уг саналаа хүргүүлнэ гэсэн албан бус мэдээлэл байна” гэв.

Чухам ямар шалтгаанаар ЭМДЕГ-ын дарга Ч.Алтанхуяг нарын хүмүүсийг хойшлуулашгүйгээр дайчлан баривчилсан нь тодорхойгүй байгаа ч “Эрүүл мэндийн даатгалын сангийн мөнгөн хөрөнгийг арилжааны банкуудад тараан байршуулж, хүүгийн орлогыг нь хувьдаа авсан гэх шалтгаанаар баривчилсан” гэх албан бус мэдээлэл байна.

Бид энэ талаар үргэлжлүүлэн мэдээлэх болно.

---