УИХ-ын гишүүн Х.Нямбаатар: 

-Ард нийтийн санал асуулга гэдэг тусдаа асуудал. УИХ-ын нэр бүхий 25-аас доошгүй гишүүн гарын үсэг зурсан тогтоолын төслийг УИХ-д өргөн барьж, гуравны хоёроос доошгүй нь дэмжиж гэмээнэ ард нийтийн  санал асуулга явуулах нэг эрх зүйн үндэс бүрдэнэ. Мөн Ард нийтийн санал асуулгын хуулиар Ерөнхийлөгч Ард нийтийн санал асуулгын тогтоолын төсөл санаачлах эрх үүсдэг.

Тэгэхээр ийм хоёр өөр тусдаа зүйлийг нэг дор шийдэх боломжгүй. Бид анхнаасаа үндсэн хуулийн өөрчлөлт ярьсан. Өөрчлөлтөө батлах эцсийн арга замаа Ард нийтийн санал асуулгаар шийдэхээр болсон. Энэ хувилбараар явна. Ерөнхийлөгчийн асуултын тухайд УИХ тусдаа хэлэлцэж, тусад нь шийдэх ёстой асуудал. Өөрөөр хэлбэл, хоёр өөр агуулгатай зүйлийг нэгтгэж болохгүй.

Нэг нь, Үндсэн хуулинд нэмэлт өөрчлөлт оруулах, нөгөөх нь Монгол Улсын Засаглалын хэлбэр ямар байх вэ гэдэг асуудал. Ард нийтийн санал асуулгаар гурав хүртэлх асуудлаар асуулт асууж болно гэсэн зүйлттэй.

Бид урьд нь Ард нийтийн санал асуулгын тухай хуулийг хэрэглээнд оруулж байгаагүй. Тэгэхээр уг хуулийг зөв зүйтэйгээр олон нийтэд таниулах хэрэгтэй. Аравдугаар сарын сүүлийн өдрүүдэд ард иргэдээс санал авч шийдэх хэрэгтэй.

Ард нийтийн санал асуулгын төсвийн мөнгийг бүлэг дээр багасгах шийдэлд хүрсэн. Шууд гарах зардлаас гаднах бусад зардлыг орон нутгийн төсөвт суулгахаар болсон. Сурталчлах, санал авах энэ ажлыг орон нутгийн төсөвт тусгахаар зохицуулж байна. 15 тэрбум төгрөгөөс доош байх шийдвэр гаргахыг УИХ дахь МАН-ын бүлэгт өчигдөр даалгасан.

УИХ-ын чуулганы нэгдүгээр хэлэлцүүлгийн үеэр төслийг татах эрхтэй бөгөөд тэрнээс цаашид төсөл татах гэдэг ойлголт байж болохгүй.

---