АТГ-ын сар бүрийн мэдээллийн цаг өнөөдөр боллоо. АТГ-ын олон нийттэй харилцах асуудал хариуцсан ахлах ажилтан Т.Баярхүү "АТГ нь авлигын эсрэг хуулийн 18-д заасны дагуу авлигын эсрэг сургалт, сурталчилгааг явуулж байгаа. Мөн авлигын хэрэгт холбогдсон албан тушаалтнуудад хариуцлага тооцуулах, урьдчилан сэргийлэх чиглэлээр зөвлөмж хүргүүлж ажилладаг" гэлээ.

Тэрбээр цааш нь, 
-НИТХ-ын тэргүүлэгчдийн тогтоолоор "Буянт-Ухаа-2" хороололд ашиглалтад орсон 972 айлыг сонгон шалгаруулах ажиллагааг шударга, ил тод явуулах журмыг баталсан. Уг тогтоол гарах үед АТГ-аас сонгон шалгаруулалтыг ил тод явуулах зөвлөмжийг хүргүүлсээр байхад холбогдох албан тушаалтнууд системд халдах, албан тушаалын эрх мэдлээ зүй бусаар ашигласан зөрчил илэрсэн.
Авлигын гэмт хэргээс урьдчилан сэргийлэх зөвлөмжийг өгсөөр байхад авлигын хэрэг гарсаар байгаа нь төрийн байгууллагын албан тушаалтнууд нэг нэгэндээ найр тавьсан, хаацайлсан буруу жишгээс үүдэлтэй.
Жастын Ш.Батхүүгийн хэргийг АТГ-аас шалгаж дуусаад Нийслэлийн прокурорын газарт өнгөрсөн онд шилжүүлсэн боловч шүүхээс уг хэргийг нэмэлт мөрдөн байцаалтад буцааж, хэргийг сунжруулан удаасаар байна.

Нийслэлийн Засаг дарга асан Э.Бат-Үүл, түүний хүү болох Б.Чулуудай нарт холбогдох хэргийг шалгаж дуусаад 2018 оны 10 дугаар сард шалгаж дуусаад прокурорт шилжүүлсэн боловч хэргийн хөөн хэлэлцэх хугацааг дуусгах зорилготойгоор хуульд нийцэхгүй гомдол гаргаж сунжруулсаар байгаа нь харамсалтай.
2016 оны 12 дугаар сард шүүхэд шилжүүлсэн хэргийг одоог болтол шүүх шийдвэрлэхгүйгээр байшингаас байшингийн хооронд явуулж хугацаа хожсоор байгаа нь АТГ-ын мөрдөгчдийн хийсэн мөрдөн шалгах ажиллагааг ямар ч үр дүнгүй болгож байна.
Иймд бид АТГ-аас шалгаж дуусган шүүхээр шийдвэрлүүлсэн хэргийн бичлэгийг олон нийтэд ил болгож байна.
Энэ бичлэгт гаалийн ажилтнууд бусдыг хяхан боогдуулах замаар авсан авлигын мөнгөө ор, шкаф зэрэгт хийж нуун далдалсан нь харагдаж байна. Бичлэгт харагдаж буй мөнгийг эд мөрийн баримтаар хураан авч, гурван шатны шүүхээр ял шийтгүүлсэн.
Гаалийн нэг байцаагч 90 тонн ачааг шалгахгүйгээр хил давуулсныхаа төлбөрт бусдаас 4.5 сая төгрөгийн хахууль авсан байсан. Тухайн 90 тонн ачааг задлан шалгахад, улсад 28 сая төгрөгийн татвар төлөх хэмжээний бараа болох нь тогтоогдсон. Авлигын гэмт хэрэг гарсаар, тасрахгүй байгаа учраас бид урьдчилан сэргийлэх зорилгоор эдгээр бичлэгүүдийг ил болгон зарлаж байгааг ойлгоорой. Иргэд олон нийт та бүхэн авлигын гэмт хэргийн мэдээллийг тухай бүр бидэнд мэдээлж хамтран ажиллахыг уриалж байна.
Авлигачдын бичлэгийг ил болгосны төлөө зарим байгууллага, албан тушаалтнууд эмзэглэж байна билээ. Тэгэх шаардлага байхгүй. Улсад учруулж байгаа асар их хор хохирлыг иргэд ойлгуулахын тулд л энэ ажлыг хийж байгаа.
Нийслэлийн орон сууцны корпорацид ажилладаггүй албан тушаалтнууд бусдаас авлига авсан байж болзошгүй нь тогтоогдсон тул эрүүгийн хэрэг үүсгэн шалгаж байгаа гэлээ. 

Бид удахгүй та бүхэнд тус видеог хүргэх болно. 

---