Баянзүрх дүүргийн 22-р хороонд байрлах “Амар Амгалан-1, 2” орон сууцыг барьсан “Нарны хүү, сарны охин” компанид хоёр жилийн өмнө урьдчилгаа мөнгө төлж, захиалга өгсөн 200 гаруй иргэн 450 сая төгрөгөөр хохироод байгаа талаараа өнөөдөр мэдээлэл хийлээ.

Анх тус байранд захиалга авахдаа “Нарны хүү, сарны охин” компанийн захирал Д.Гүрсоронз урьдчилгаа 10-20 хувь төлөх боломжтой, орлого нотлох шаардлагагүй, банкны зээлтэй байж болох бөгөөд нэг ам.метрийг нь 1,250,000 төгрөгөөр зарна гэгчлэн “Монгол HD” телевизийн “Өнөө өглөө” хөтөлбөрөөр ипотекийн 5 хувийн зээлийн төслийг хэрэгжүүлэх тухайгаа ярьжээ.

Тухайн үед ипотекийн 8 хувийн зээл зогссон байсан тул иргэд тус компанийг сонгосон тухай хохирсон иргэдийн нэг Ц.Ариунаа дурдсан юм. Гэвч анх захиалга өгсөн иргэд одоо хүртэл байрандаа орж чадаагүй байхад тэдний байрыг бусдад дээрх аргаар зарж борлуулж байна.

Тодруулбал, захиалга өгсөн иргэдийн байрыг нэг ам.метрийг нь 1,850,000 төгрөгөөр өөр хүмүүс зарах болжээ.

Хоёр жилийн өмнө 10-20 сая төгрөгийн урьдчилгаа өгөөд байрандаа орж чадаагүй 15 айл ийнхүү нэгдсэнээс гадна гэрээгээ цуцалсан хэрнээ мөнгөө аваагүй 20 гаруй айл байгаа гэнэ. Мөн “Амар Амгалан-2,3” орон сууцны хохирогчид ч байгаа юм.

Хохирсон иргэдийн хувьд шүүх цагдаад хандахад гэрээ байгуулсан тул Иргэний хэргийн шүүхээр шийдэгдэнэ гэсэн ч “Нарны хүү, сарны охин” компанийн байр, захирал нь олдохгүй байгаа тул  хохирлыг нэхэмжилж чадахгүй байна гэдэг хариуг иргэдэд өгдөг байна.

Хохирсон иргэдийн хувьд “Нарны хүү, сарны охин” компанийн захирал Д.Гүрсоронзтой холбогдоход “Манай компани өөр компанид залилуулсан тул та бүхний хохирлыг барагдуулж чадахгүй байна. Хөөцөлдөх газраа хөөцөлдөөд хандах газартаа хандана биз” гэсэн хариуг өгчээ. Одоо хүртэл “Амар амгалан” хотхоны байрны гэрээ гараагүй бөгөөд хохирсон иргэд Иргэний хуулийн 12.1 үндэслэн байрандаа хүчээр орж, амьдарч байгаа бөгөөд уг асуудлыг шийдэгтэл байрнаасаа гарахгүй гэж мэдэгдсэн юм.

Иргэдэд сэрэмжлүүлж хэлэхэд үл хөдлөх хөрөнгө авах гэж байгаа бол баталгаатай газарт хандаж, залилуулахгүй байхыг анхааруулж байна.

---