Үндсэн хуульд оруулах нэмэлт өөрчлөлтийн төслийг энэ удаагийн парламент хаврын ээлжит бус чуулган хуралдуулж хэлэлцэж эхэлсэн билээ. Уг хуулийн хоёрдугаар хэлэлцүүлгийг нэг сар орчим хэлэлцэж өчигдөр /2019-09-06/ хоёрдугаар хэлэлцүүлгийг дуусгажээ. 

Хуулийн гуравдугаар хэлэлцүүлэгт орохын өмнө МАН-ын бүлэг цаашид Үндсэн хуульд нэмэлт өөрчлөлт оруулахдаа "Бүх ард түмнээрээ хэлэлцүүлэх нь зүйтэй" гэж шийдвэрлэжээ.

Энэ асуудалтай холбогдуулан УИХ-ын гишүүд байр сууриа илэрхийлсээр байна. Жишээлбэл өнөөдөр /2019-09-07/ хуралдсан ТББХ-ны хуралдаан дээр УИХ-ын гишүүн Ж.Мөнхбат:

"МАН мөрийн хөтөлбөртөө Үндсэн хуулийн өөрчлөлтийг ард түмнээсээ асууж байж шийднэ гэж амлаж гарч ирсэн. Ард түмэн зөвшөөрвөл өөрчлөөд явна, зөвшөөрөхгүй гэвэл хуучин хэвээрээ л үлдэнэ. 

Үндсэн хуулийн нэмэлт өөрчлөлтийн сайн сайн шинжүүд орж ирж байна. Эргэж харах асуудал ч бий. Ерөнхий сайд кабинетээ бүрдүүлдэг, Засгийн газрын гишүүдээ томилдог, төрийн албан хаагчдыг хомроглон халдаг асуудлыг халах хоёр зүйл заалт байна. Ард түмний санал асуулга асуух эсэхийг шийдэхэд парламент хоёр хэлэлцүүлэг хийхдээ ярих байх. 

Зуны эхэн сарын шинийн гурванд гэсэн цаг хугацааны товыг дэмжиж байна" гэлээ.  

---