Сирийн бамбай бүс буюу Засгийн газрын хяналтгүй босогчдын байрлаж буй цөөн газруудын нэг Идлиб рүү тусламж хүргэж байсан Туркийн цуваа руу агаараас дайралт хийжээ. Засгийн газраас явуулсан агаарын дайралтын улмаас гурван энгийн иргэн амиа алдаж, 12 хүн гэмтэж шархадсан тухай Турк улсын Батлан хамгаалах яамнаас мэдэгдэв.

Босогчдыг дэмжигч Турк болон Засгийн газрыг дэмжигч Оросын Засгийн газар хоорондын тохиролцоогоор Сирийн Идлиб хотод босогчдыг байрлуулж бамбай бүс болгон үлдээсэн юм. Гэвч энэ оны дөрөвдүгээр сараас хойш Сирийн Засгийн газар довтлох болсон гэжээ.

Туркийн илгээсэн цуваанд 50 орчим зэвсэгт техник, багадаа таван танк багтсан байжээ. Сирийн эрх баригчид үүнийг өдөөн хатгасан үйлдэл гэж үзсэн тул террористуудын эсрэг дайралт хийхээ хэзээ ч зогсоохгүй гэсэн байна. Их Британийн Сирийн хүний эрхийг ажиглах газраас наймдугаар сарын 19-ний өдөр болсон агаарын дайралтыг Оросын нисэх онгоц гүйцэтгэсэн гэж мэдээлжээ.

Барууны хэвлэл мэдээллийн хэрэгслүүдийн дамжуулснаар Сири улсад найман жил үргэлжилсэн иргэний дайны дараа Засгийн газар босогчдын эзэмшилд үлдсэн сүүлчийн газруудыг бүрэн хяналтдаа оруулж ялалтаа баталгаажуулахыг эрмэлзэж байгаа юм.

 

 

Эх сурвалж: www.bbc.com

---