Өмнөговь аймгийн Эрүүл мэндийн газрын ажилтнууд байгууллагынхаа 80 жилийн ойн хүлээн авалтад оролцох үедээ олноороо хоолны хордлогод оржээ. Хүндэтгэлийн хүлээн авалт нь Даланзадгад хотын “Даян хаан” нэртэй ресторанд энэ сарын 08-ны өдөр болсон бөгөөд хордлогын шинж тэмдэг нь 10-ны өдрөөс эхлэн илэрч эхэлсэн байна. Өмнөговь аймгийн Эрүүл мэндийн газрын дарга Ц.Өнөржаргал хэвлэл өгсөн ярилцлагадаа “Хүлээн авалтад оролцсон 170 гаруй хүний 66-аас нь хордлогын шинж тэмдэг илэрч, 20 хүн нь Бүсийн оношилгоо эмчилгээний төвд хэвтэн эмчлүүлж байна. Хордлогод орсон хүмүүсээс шинжилгээ авахад сальмонеллёз бактериар үүсгэгдсэн гэдэсний халдварт өвчин болох тогтоогдсон. Халдварт өвчний тархалтыг зогсоохын тулд Улаанбаатар хотоос тархвар судлаач, лабораторийн эмч, клиникийн эмчийг дуудсан байгаа. Энэхүү бактер нь өндөг махнаас үүсгэгддэг, мөн бусдад халдварладаг учраас хүлээн авалтад оролцсон хүн нэг бүртэй холбогдож, гэрт нь очиж ариутгах ажлыг хийж байгаа” гэсэн юм.

Бид Өмнөговь аймгийн Мэргэжлийн хяналтын газартай холбогдон уг хэргийн талаар тодруулахад “Хүн хордсон асуудлаар холбогдох арга хэмжээнүүдийг авч ажилласан. Өнөөдөр 14.00 цагаас яг энэ асуудлаар хуралдсаны дараа олон нийтэд мэдээлэл өгнө” гэв.

---