Сүүлийн хоёр жилийн хугацаанд улсын хэмжээнд бүртгэгдсэн нийт зам тээврийн ослын 60 хувь, хүний амь нас хохирсон хэргийн 75 хувь, гэмтэж бэртсэн хүний 50 орчим хувь нь орон нутгийн замд үйлдэгдсэн байна. Иймээс “Орон нутгийн зам-Хөдөлгөөний соёл” арга хэмжээг дөрвөн сарын хугацаатай хэрэгжүүлж, өнөөдөр тайлагнав.

Хяналт шалгалтын явцад 162247 зөрчил илэрсэн. Үүнээс согтуугаар тээврийн хэрэгсэл жолоодсон 3875, цагдаагийн нийтлэг үүргээр 424, эрэн сурвалжлагдсан 109 хүн, цагдаагийн байгууллагаас зарлагдсан 155 тээврийн хэрэгслийг тус тус илрүүлсэн байна.

Тээврийн цагдаагийн албаны Урьдчилан сэргийлэх хэлтсийн дарга, цагдаагийн хурандаа Э.Бөхбат “Хяналт шалгалтын үр дүнд хөдөлгөөний аюулгүй байдлын эсрэг гэмт хэрэг 18.3 хувь, амь нас нь хохирсон хүн 24 хувь, гэмтсэн хүн 9.6 хувиар буурсан. Энэ аяны хүрээнд цагдаагийн байгууллагын хамт олон 20 хүний алтан амийг аварсан гэсэн үг. Гэхдээ замын цагдаа таны өмнөөс зүтгэхийн оронд өөрсдийнхөө төлөө амь насаа хайрлан жолооны дүрмээ барин зүтгэдэг болоосой” гэсэн юм.

Хяналт шалгалтын явцад жолооны үнэмлэхгүй, архи уучихсан байж дөрвөн хүүхдээ суулгаад 120 гаруй км-ын хурдтай хөдөлгөөнд оролцож байхад илрүүлэхэд “жолооны дадлага хийж байсан” хэмээн хээв нэг хариулсан жолооч нар байсан байна. Мөн гэрэл шилжүүлэхгүй байгаагаас ослын тоо буурахгүй байгаа талаар дурдсан юм.

Цаашид энэ аяны хүрээнд байнгын хяналтын посоо бүрэн ашиглалтанд оруулж, авто зам дээрх хар цэгүүдийн тоог багасгах зэргээр орон нутгийн замын хяналт шалгалтын ажлаа үргэлжлүүлэн ажиллах юм байна.

---