Ардчилсан намын хуулийн бодлогын зөвлөх Т.Энхсайхан өнөөдөр Хууль зүй дотоот хэргийн яамны үүдэнд эсэргүүцлийн жагсаал хийлээ.

АН-ын Хуулийн бодлогын зөвлөх Т.Энхсайхан:

Өнөөдөр бидний жагсаж буй гол шалтгаан бол “Хөөн хэлэлцэх хугацаа”. Би анхнаас нь л хэлж байсан. Энэ Ц.Нямдорж гэдэг хуулийн хулгайч, бүлэглэлтэйгээ нийлээд хуулийн маш ноцтой хулгай хийжээ гэдгийг хэлээд байхад хэн ч тоогоогүй. Гэтэл МХЕГ-ын нэг хэлтсийн даргын оймсноос 10 мянган ам.доллар гарч ирсэн атал хариуцлага тооцож чадахгүй болонгуутаа гэнэт л Х.Нямбаатараар ахлуулсан ажлын хэсэг байгуулаад “Хөөн хэлэлцэх хугацаа”-г нэн даруй Эрүүгийн хуульд оруулъя гээд бужигнаад эхэллээ. Одоо ажлын хэсэг гараад хөөн хэлэлцэх хугацааг зассан ч нэмэр байхгүй. Энэ есөн сард Жастын Ш.Батхүүгийн хэргийн хөөн хэлэлцэх хугацаа дуусна. Адгийн захын хуульч Эрүүгийн хуулийг буцаан хэрэглэж болдоггүй гэдгийг мэдддэг. Хөөн хэлэлцэх хугацааг нэн тэргүүнд засаад хуулийг буцаан хэрэглээд аль гэдэг асуудлыг давхар шаардаж байна. Одоо шалгагдаад явж байгаа олон арван авлигын том хэрэг байгаа боловч бүгд хөөн хэлэлцэх хугацаанаас болж хэрэгсэхгүй болох гээд байна.

Нэг ноцтой зүйлийг хэлэхэд Ц.Нямдорж, “Алтжин” ХХК-ийн захирал Г.Алтан нарын гарт “Олон овоот”-ын орд орчихлоо. Энэ хоёр хүн “Олон овоот”-ын ордыг хятадуудтай ашгийг 40, 60-аар хуваах гэрээг Улсын баяр наадмын үеэр хийсэн  гэдэг мэдээллийг маш хариуцлагатай хүн хэллээ. Энэ мэдээлэл үнэн эсэхийг тодруулахаар бид өнөөдөр Ашигт малтгал газрын тосны газарт шаардлагаа хүргүүлж байна. “Олон овоот”-ын ордын нөөц нь Оюутолгойн ордоос ч том гэдгийг АНУ, Япончууд тогтоосон гэдэг мэдээлэл байгаа. Ц.Нямдорж “Олон овоот”-оос орж ирсэн мөнгөөр өөрийнхөө бэлтгэсэн залуучуудыг угжиж, 2020 оны сонгуульд ялуулах гэж байна гэсэн мэдээлэл бас бидэнд ирсэн. Хэрвээ ингэх юм бол Хятадын гар хөл, тагнуул болсон, Монгол төрийн Исмэйл тайж Ц.Нямдоржийн гарт Монголын төр орно. Монголыг мэрж устгах БНХАУ-ын төлөвлөгөө хэрэгжээд эхэлчихлээ.

Ц.Нямдоржтонгуудыг огцортол тэмцээд өгөөч ээ гэж сэхээтэн залуучуудаас хүсэж, бас уриалж байна. Хэрвээ Ц.Нямдорж гэдэг хүн унавал Монголын төрд үүрлэсэн авлигын мафийн том сүлжээ нуран унана. Толгойлогчийг унагаахгүйгээр бид амжилтад хүрэхгүй. Ц.Нямдоржийн атганд цагдаа, шорон, хуулийн яам нь байна. Энэ хүн харин хуулиар бусад авлигачдыг хамгаалж байна. Хөөн хэлэлцэх хугацаанаас болж Монголын бүх авлигачид суллагдах гэж байна. Хөөн хэлэлцэх хугацааг буцаан хэрэглэсэн нэг тохиолдол дэлхийн практик байдаг. Нийт ард түмний эрх ашиг зөрчигдөх гэж байсан учраас тэгсэн юм билээ. Тиймээс авлигын хэргүүдэд хуулийг буцаан хэрэглэхийг шаардаж байна. Хэрвээ тэгэхгүй бол хуулиа мянга өөрчлөвч Жастын Ш.Батхүү суллагдана.

---