Токиогийн олимп болоход яг нэг жил үлдлээ! Олимп болохоос яг нэг жилийн өмнө энэ өдөр Токиогийн Опимпийн зохион байгуулах хороо Олимпийн медалийн дизайныг олон нийтэд дэлгэлээ.

 Нийт 400 дизайнеруудаас түрүүлсэн Жүничи Каваниши медалийн дизайн гаргасан бөгөөд Олимпийн хорооноос медальд олимпийн таван цагираг, албан ёсны нэр, ялалтын бурхан Nike болон Panathenaic цэнгэлдэх хүрээлэнг багтаахыг үүрэг болгосон аж.

Медалийн загвар нь алдар хүндэд хүрэхийн тулд тамирчид өдөр бүр ялалтын төлөө тэмцэх ёстой гэсэн утгатай аж. Өнгөлсөн, хурц ховил нь гэрлийг цацраах бөгөөд энэ нь тамирчид болон тэднийг дэмждэг хүмүүсийн эрч хүчийг бэлэгдэнэ. Үүнээс гадна спортын олон талт байдал, спортоор хичээллэж буй шаргуу хүмүүсийг хүндэтгэсэн утга ч багтжээ. Мөн дэлхийн өнцөг булан бүрд байгаа хүмүүсийн найрамдал, халуун сэтгэлийг илтгэж буй юм. Олимпийн бүх медаль 85 мм диаметртэй, алтан медалийн хувьд цэвэр мөнгөн дээр 6 грамм алт нэмжээ.

2017 онд Токиогийн Олимпийн хороо хүмүүсээс хуучин утсаа хандивлахыг хүссэнээр Токиогийн олимпийн медалийг хийхэд 6.2 сая ширхэг утаснаас алт 32 кг, мөнгө  3500 кг эцэст нь зэс 2200 кг-ыг гаргаж авсан байна.

---