"Таны заавал сонсох 500 цомог" №500: OutKast, ‘Aquemini’

www.livetv.mn/music сайтын зүгээс дуу, хөгжим сонирхогчдодоо зориулан "Rolling Stone" сэтгүүлээс санал болгож буй "Таны заавал сонсох 500 цомог"-ийг цувралаар танилцуулж байна.

№500: OutKast, ‘Aquemini’

Гарсан он: 1998 он
Төрөл: Хип Хоп
Үргэлжлэх хугацаа:74:47
Лэбэл: LaFace/Arista/BMG

‘Aquemini’ цомог нь "Таны заавал сонсох 500 цомог" жагсаалтад багтсан цөөхөн хэдэн хип хоп урсгалын цомгийн нэг бөгөөд OutKast хамтлагийн гурав дахь студийн цомог юм. Уг цомог чухам яагаад шилдэг цомгоор нэрлэгдэх болсон шалтгаан нь цомгийг бүтээхэд OutKast хамтлагийн хоёр гишүүнээс гадна маш олон тооны мэргэжлийн уран бүтээлчид хамтран бүтээлцсэн нь цомгийн дуу бүрээс мэдрэгдэнэ. Дуунуудын утга, санаа нь хүний мөн чанар, донтолт, хүн хоорондын харилцаа зэрэг нарийн сэдвүүдийг агуулсан байдаг нь хөгжим шүүмжлэгчдээс өндөр үнэлгээ авчээ. Тэр ч утгаараа цомог гарсан даруйдаа Billboard болон Top R&B/Hip-Hop жагсаалтын дэд байранд бичигдсэн байдаг.

Цомгийн гурав дахь дуу болох "Rosa Parks" дуу нь OutKast хамтлагийг шүүхэд дуудагдахад хүргэсэн дуу юм. Учир нь уг дуунд гардаг хүний эрхийн төлөө тэмцэгч Роза Паркс өөрийнх нь нэрийг зөвшөөрөлгүйгээр дуундаа ашигласан, зан авирыг нь гүтгэсэн үндэслэлээр цомог гарснаас нэг жилийн дараа буюу 1999 онд шүүхэд хандсан байдаг. Шүүх түүний нэхэмжлэлийг үндэслэлгүй хэмээн хэрэгсэхгүй болгосон ч 2003 онд давж заалдах шатны шүүхээс OutKast хамтлаг болон LaFace рекордсыг Роза Парксын нэр хүндийг залуучуудын дунд өсгөхөд тодорхой ажил хийхийг даалгасан байна.