Бүх цаг үеийн шилдэг 500 дуу: №14 Bob Dylan, ‘Blowin’ in the Wind’
Бүх цаг үеийн шилдэг 500 дуу: №14 Bob Dylan, ‘Blowin’ in the Wind’

 

Манай сайт эрхэм таны сонорыг мялаах дэлхийн шилдэг дуунуудыг цуврал хэлбэрээр оруулж байгаа билээ. 

"Rolling Stone" сэтгүүл бүх цаг үеийн шилдэг 500 дууг нэрлэж байна. 

"Rolling Stone" сэтгүүлийн хувьд дэлхийн хөгжмийн зах зээлд хүлээн зөвшөөрөгдсөн "шилдгийн шилдэг" жагсаалтыг төрөл бүрээр гаргаад удаж байна. Эндээс бид "Бүх цаг үеийн шилдэг 500 дуу" жагсаалтыг онцлон уншигч, үзэгч та бүхэндээ цувралаар танилцуулж байгаа юм.

Bob Dylan, ‘Blowin’ in the Wind’

Америкийн домогт дуучин, дуу зохиогч Боб Диланыг мэдэхгүй хүн ховор бизээ. Тэрээр зөвхөн хөгжмийн ертөнцөд танигдахаас гадна хүний эрхийн төлөө, нийгмийн зүтгэлтэн юм. Тухайлбал түүний дуулсан "Blowin' in the Wind" (1963) болон "The Times They Are a-Changin'" (1964) дуунууд нь хүний эрхийн хөдөлгөөн, дайныг эсэргүүцэх хөдөлгөөний сүлд дуу болсон байдаг. Энэ өглөө эрхэм танд сонордуулж буй алдарт "Blowin' in the Wind" дуу нь 1962 онд зохиогдсон бөгөөд гүн утгатай дуу юм. 2016 онд Нобелийн Утга зохиолын шагналаар Боб Диланыг шагнахдаа “Америкийн агуу түүхт дууны шүлгийн уламжлалыг баяжуулж шинэ яруу найргийн хэллэг бий болгосон учир” хэмээн түүнийг тодорхойлсон байдаг.

‘Blowin’ in the Wind’ дууны шүлгийг экс ерөнхийлөгч Н.Энхбаяр "Хүчит салхи мэднэ" хэмээн орчуулсан байдаг. Түүний орчуулсан шүлгийг бүрэн эхээр нь хүргэе.

Хүчит салхи мэднэ (Blowing in the wind)

Хичнээн холын зам туулсных нь дараа
Хэн нэгнийг хүн мөн хэмээн тоодог юм бол?
Хэдэн далай гэтэлснийхээ дараа
Хээрийн галуу унтаж амардаг юм бол?
Хэдэн удаа их буугаар буудсаныхаа дараа
Хэрэггүй "тоглоом" юм гэдгийг нь ойлгодог юм бол?

Хүчит салхи хариуг нь мэднэ, найз минь
Хүчит салхи хариуг нь хэлнээ
Хэдэн жил уулс сүндэрлэж байгаад
Хүчирхэг давалгаанд идэгддэг юм бол?

Хэдэн жил амьдарч байгаад хүмүүс
Хэний ч боол биш гэдгээ ойлгодог юм бол?
Хүний зовлонг олж харахаа болихын тулд
Хэдэн удаа нүүрээ буруулах ёстой юм бол?

Хүчит салхи хариуг нь мэднэ, найз минь
Хүчит салхи хариуг нь хэлнээ

Хөх тэнгэр байна гэдгийг олж харахын тулд
Хэдэн удаа харцаа дээш өргөх ёстой вэ?
Хэн нэгний уйлж байгааг сонсохын тулд
Хэдэн чихтэй байх ёстой юм бол?
Хэдэн хүн амь насаа алдсаны дараа
Хэтэрхий олон хүн үхсэнийг ойлгодог юм бол?

Хүчит салхи хариуг нь мэднэ, найз минь
Хүчит салхи хариуг нь хэлнээ

Холбоотой мэдээ
Сэтгэгдэл үлдээх
Сэтгэгдэл